Pagtukod og edipisyo sa public road easement gidili sa probinsiya

CEBU, Philippines — Si Gobernador Gwendolyn Garcia niluwat og kamandoan nga nagdili sa pag-isyu og building permit ug uban pang permit alang sa pagtukod og edipisyo o estraktura diha sa public road easement.

Ang bag-ong giluwatan ni Garcia nga executive order nisubay kini sa giluwatan nga kamandoan ni kanhi presidente Elpidio Quirino nga nag-ila ug nag-establisar og klasipikasyon sa mga dalan national, provincial, municipal ug city roads.

Base sa EO No. 1880 ni Quirino nga ang mga national roads kinahanglang adunay 20 ka metros nga minimum nga road easement; 15 metros ang pinakaubos nga righ of way sa provincial roads ug 10 ka metros usab ang sa city ug municipal nga dalan.

Matud ni Garcia nga sa iyang bag-ong giluwatan nga kamandoan ang pagtukod og estraktura sa easement sa mga pampubliko nga dalan maoy nakababag sa mga pagpalapad sa dalan nga niresulta sa kalangay sa proyekto ug inconvenience sa publiko ug sa gobiyerno.

“The issuance of building permits and any related permits for structures to be constructed within the designated easements of national, provincial, municipal and city roads, as defined in Executive Order No. 180 series of 1948, is strictly prohibited”, tipik sa  EO ni Garcia nga adunay petsa nga Hulyo 2, 2024.

Gimandoan ni Garcia ang mga mayor sa tibuok Probinsiya sa Sugbo ug ang tagsa- tagsa niini ka building officials nga siguraduhon nga istrikto ang pagpatuman sa EO sa gobernadora. (BANAT NEWS)