Garcia nihatag og usa ka semana sa nagpatuman sa CBRT

CEBU, Philippines — Gihatagan og usa ka semana ni Gobernador Gwendolyn Garcia ang mga nagpatuman sa Cebu Bus Rapid Transit (CBRT) nga kuhaon ang mga materiyales sama sa puthaw ug uban pa diha sa may Osmeña Boulevard atubangan sa Capitol building.

Matud ni Garcia nga gawas nga kadelikado ug dugang babag sa dagan sa trapiko diha sa maong dapit padayon gihapong gisupak sa proponents sa CBRT ang iyang kamandoan nga ihunong usa ang  pagtrabaho sa duha ka bus stations sa CBRT diha sa lugar.

“Kindly take those out kay wala man mo niabang namo”, matud ni Garcia ngadto kang Engineer Norvin Imbong, project manager sa CBRT atol sa ilang tigom niadtong Hulyo 2, 222024.

“Yuta ni namo, we will exercise our right over this”, padayag ni Garcia.

Ang Kapitolyo maoy nangangkon sa pipila ka luna diha sa may Osmeña Boulevard gikan sa Capitol compound padulong sa Fuente Rotunda.

Base sa taho sa Sugbo News nga niabot na sa 126 ka adlaw sukad nga giluwatan ni Garcia ang iyang Executive Order No. 16-2024 niadtong Pebrero 27, 2024 nga nagmando sa mga kontraktor nga ihunong usa ang pagtrabaho sa bus station sa CBRT diha sa may Osmeña Boulevard atubangan sa Capitol building.  Sa maong taho, si Imbong nagkanayon nga nakasabot siya sa posisyon sa gobernadora apan naghulat siya sa direktiba sa ilang central office sa Department of Transportation (DOTr), primary agency sa pagpatuman sa CBRT. (BANAT NEWS)