Lalaki nga giingong nagbinastos gipadakop sa duha ka babaye
CEBU, Philippines — Nadetiner sa Abellana Police Station sa Cebu City Police Office(CCPO) ang usa ka 32-anyos nga lalaki human kini gipadakop sa duha ka babaye nga namaligya og sud-an tungod kay giingong gibastos sila niadtong Biyernes sa udtodiha sa Barangay Capitol Site, Dakbayan sa Sugbo.
Ang suspetsado mao si alyas “Ete”, 32-anyos, rider sa ride-hailing app, lumad nga taga Probinsiya sa Bohol apan kasamtangang nagpuyo sa Dakbayan sa Mandaue.
Si Ete nipasabot kini ngadto sa mga tigbalita kabahin sa maong insidente.
Giingong samtang nag-estambay sila ang duha ka babaye nga sakay og motorsiklo nihunong sa ilang nahimutangan tungod kay nipalit og butong.
Ang nahisgutang mga babaye adunay dalang sud-an ug gipangutana si Ete kong mopalit ba kini og sud-an. Matud ni Ete nga nitubag siya nga kong pwede tindera ang iyahang paliton ug giingong nangasuko ang maong mga babaye.
“Pagkataud-taod mopalit nako, mao to nagpili ko’g sud-an ingon ko sa iyang kauban sa tindera papalita ko’g torta maam ikaw lang pili kay kahibawo man ta unsa kalami ang mapilian nimo nga sud-an ba, unsa kalami ang torta may tong ikaw ang mopili kay kong lami ang torta mas lami gyud ang tindera mao to nangatawa”, padayag ni Ete.
Ang duha ka babaye nilakaw kini ug sa ilang pagbalik aduna na kini dalang polis.
Si Ete nangangkon nga komediya ra to ang iyahang gisulti apan giangkon niini nga sayop ang iyang gihimo ug nangayo kini og pasaylo sa duha ka babaye.
“Sa akong kaugalingon dili man nako gusto nga bastoson sila, ang ako joke lang ba”, ni Ete pa.
Ang suspetsado giingong nakahimo kini og kalapasan sa “Bawal Basto Law”.
Nunot niini, si Police Lieutenant Colonel Janette Rafter, deputy city director for administration sa Cebu City Police Office nipahimangno sa publiko nga ibutang sa hustong lugar ang pagkomediya ilabi na kon dili kaila ang tawo.
“Let us be careful of our comment especially og ang atong hatagan og comment wala ta kaila ug unsay iyahang giagian ug kinsa pod nang tawhana”, matud ni Rafter. (BANAT NEWS)
- Latest
