Programa nga motubag sa epekto sa climate change ilusad

CEBU, Philippines — Ilusad sa Department of Social Welfare and Development (DSWD) ang "Panahon ng Pagkilos," ang bag-ong community-led climate adaptation project sa tuig 2025.

Pinaagi sa Kapit-Bisig Laban sa Kahirapan-Comprehensive and Integrated Delivery of Social Services (KALAHI-CIDSS), ang ahensiya nagsugod na sa pagplano sa bag-ong proyekto nga motubag sa epekto sa climate change kun pagbag-o sa klima.

Ang community-led climate adaptation project mag-atiman sa mga lugar nga adunay taas nga poverty incidence, grabe nga climatic hazards, dunay daghan nga indigenous population.

Nagkanayon si KALAHI-CIDSS National Program Manager Atty. Bernadette A. Mapue-Joaquin nga komitido ang KALAHI-CIDSS sa pag-institutionalize sa ilang programa ug pag-andam og bag-ong proyekto aron matabangan ang mga kabus nga komunidad sa pag-atubang sa krisis sa klima.

Dugang pa niya, aron masiguro nga ang mga paningkamot alang sa epektibo nga pagsulbad niini nanginahanglan ug hiniusa nga mga solusyon. Sa pagkumbati sa climate risks, ang programang KALAHI-CIDSS aduna nay daghang kalampusang nakab-ot sama sa pagtabang pagtukod og 1,250 ka community centers, multi-purpose buildings, ug evacuation centers. Lakip usab ang 3,566 ka quarantine facilities.

Kini gumikan sa ilang paghatag og importansya sa healthcare facilities, ug pag-abag sa publiko panahon sa kalamidad.

Dugang niana, mas gipalig-on pa ang pagpangandam ug kapasidad sa pagtubag sa mga lokal nga komunidad pinaagi sa ilang gihatag nga 928 ka mga unit sa disaster ug pandemic response ug rescue equipment. (BANAT NEWS)