Kapitolyo nangandam na sa International Economic Forum
CEBU, Philippines — Subsob na karon ang gihimong preparasyon sa Kapitolyo alang sa plano niini nga pagpahigayon og International Economic Forum.
Gitigom na daan ni Gobernador Gwendolyn Garcia ang tanang stakeholders alang sa maong dakong kalihokan gikan sa nagkadaiyang sector sama sa business, medical, airlines, hotels, travel agencies ug uban pa aron mahan-ay ang plano sa maong forum.
Ang maong forum gipaabot nga ipahigayon gikan Agosto 21 hangtud sa Agosto 26 nga mosubay sab sa selebrasyon sa ika-455 nga Kasumaran sa Probinsya sa Sugbo.
Salmotan usab ang maong tigom sa mga delegado gikan sa nasud sa Russia.
“This event is expected to significantly benefit Cebu by boosting its medical and economic sectors” matud sa Kapitolyo.
Ang maong forum namugna human sa business trip ni Garcia didto sa Russia niadtong bulan sa Hunyo.
Gidapit ni Garcia ang mga magpapatigayon ug mga stakeholders sa turismo ug medical nga motambong sa maong forum nga himoon sa Probinsya sa Sugbo aron adunay pagbinayloay og ideya sa sector sa medical ug turismo tali sa Sugbo ug Russia ingon man sa ubang mga nasud. (BANAT NEWS)
- Latest
