Managhigala ang mga gi-salvage

CEBU, Philippines — Nailhan na patay’ng lawas sa lalake nga nakit-an sa Barangay Prenza, Lungsod sa Balamban niadtong Domingo, Hunyo 30, 2024 kini sigon pa sa Balamban Police Station. Managhigala sila sa laing patay’ng lawas nga napalgan sab sa Talisay City niadtong adlaw nga Domingo.

Matud ni Police Lieutenant Colonel Julius Garcia, hepe sa Balamban Police Station na-claim na sa tagtungod ang patay’ng lawas.

Ang igsuon sa inahan sa biktima nga si Saturnino Matibag uban ang asawa niini ug ubang paryente niadto sa Balamban Police Station kagahapon sa buntag ug gipakita sa ilaha ang pictures atol sa pagproseso sa SOCO ug Municipal Health Officer sa patay’ng lawas ingon man sa post mortem report.

Pinaagi niini giila sa mga kabanay nga ang maong lalake nga nakit-an nga wala nay kinabuhi mao ang ilahang pag-umangkon nga si Franklin Edaño, 35, residente sa Barangay Basak San Nicolas, Cebu City.

Positibo nila kining giila base sa gisul-ob sa biktima nga black t-shirt nga dunay mark sa usa ka brand sa sinina ug long pants nga maoy giingon sa uyab sa biktima nga iyahang gisuot sa wala pa kini na-missing.

Gawas niini, miingon sab ang kabanay nga dunay singsing nga silver ang biktima ug nasuta nga ang kapulisan dunay na-recover nga singsing nga silver.

Nasayran nga Hunyo 28, adlaw nga Biyernes wala na kini nakauli, gibutyag sab sa mga kabanay nga amigo kini ni Alexander Langi ang laing patay’ng lawas nga nakit-an sa Purok Bamboo, Sitio Campo 5, Barangay Manipis, Talisay City pagka adlaw’ng Domingo.

Wala sila’y ideya kun kinsa ang katapusang gikauban sa mga biktima sa dihang sila na-missing. Apan nasuta nga si Franklin usa ka mananagat ug kanhi drug surrenderee.

 “According sa tagtungod same daw sila na-missing June 28 which is that is Friday…Wala sila’y idea kinsa pero according sa ilaha sa pagpangutana  nila unsay trabaho ni Franklin, unsay background, si Franklin ay usa ka fisherman at the same time drug surrenderee siya sa ilahang Barangay but then dili siya active sa mga activity sa BADAC sa programa nato para sa atong drug surrenderee,” matud ni Garcia.

Sa impormasyon sa Municipal Health Office sa Lungsod sa Balamban wala sila’y nakit-an nga samad pinusilan ingon man dinunggaban o kaha ubang indikasyon nga gi-torture ang biktima.

Posible matod nga namatay ang biktima kay wala kaginhawa kay giputos ang tibuok nawong niini og masking tape. Susama sab niini ang gidangatan ni Langi.

Subay niini, si Cebu Police Provincial Office(CPPO) Provincial Director Colonel Percival Zorilla mimando sa iyahang mga tawo nga makig-alayon sa ubang police units ilabi na sa dapit kun asa nagpuyo ang mga biktima aron makatabang sa pag-ila sa mga responsable sa krimen.

Samtang si Police Major Windel Abellana, Public Information Office sa CPPO ang mga impormasyon nga ilang nakuha isumpay-sumpay aron makuha kun unsa gyud ang nahitabo ang pagpatay sa mga biktima.

Wala nila gisalikway ang posibilidad nga dungan nga gipatay ang mga biktima sa laing lugar ug didto lang sa Talisay City ug Lungsod sa Balamban gilabay.

Nanawagan sila sa publiko nga dunay impormasyon sa hitabo nga mo-report sa kapulisan aron masulbad ang kaso. (BANAT NEWS)