Hubog wala mobayad sa pahumot gidakop

CEBU, Philippines — Gipadakop ang usa ka 23-anyos nga lalake kay giingong nanguha kini og duha ka body spray sa usa ka convenience store diha sa Gov. M. Roa Street, Barangay Capitol Site, siyudad sa Sugbo nga wala mobayad kagahapon sa alas 5 sa buntag, Martes, Hulyo 2, 2024.

Ang gidakop residente sa Sitio San Roque sa maong barangay kinsa hubog dihang nahimo ang krimen.

Sa impormasyon sa Abellana Police Station 2 sa Cebu City Police Office alas 4:05 sa kaadlawon kagahapon nisulod sa convenience store ug nikuha og duha ka pahumot nga nagkantidad kada usa og P274 ug P249 ug gibutang kini sa iyahang bulsa.

Apan giingong wala siya niadto sa cashier ug nigawas dayun kini sa convenience store hinungdan nga gisita kini sa gwardiya sa tindahan.

Nikisi-kisi matud pa ang dinakpan maong nagnilayogay sila sa gwardiya hantod nga naposasan ug gidala dayon sa police station.   Ang dinakpan sa iyahang bahin mipasabot nga pagsulod niya sa convenience store nikuha siya sa maong mga pahumot kay mao gyud ang iyahang ganahan.

Nakita niya nga dunay galinya sa cashier maong nakadesisyon siya nga mogawas nalang kay nakainom sab siya.

Paggawas matod pa niya giingnan siya sa gwardiya nga duna siya’y gisulod sa bulsa ug gipasanginlan siyang nangawat maong niaksyon siya og palag.

Giangkon niya nga tungod sa kahubog nakalimot siya nga naa siya’y gikuha maong nahitabo kadto.

Matud niya, kaya niya baryan ang gikuha nga mga pahumot apan naguba ang iyang cellphone ug nawagtang iyahang kwarta kay gilamba siya sa gwardiya. (BANAT NEWS)