Pagsaulog sa Nutrition Month gibuksan sa siyudad sa Mandaue

CEBU, Philippines — Hingpit nga gibuksan ang mga kalihokan sa pagsaulog sa Nutrition Month nga pagahimoon sa tibuok bulan sa Hulyo 2024 pinaagi sa gipasiugdahan nga Agri Fair nga gipahigayon diha sa Mandaue City Heritage Plaza. 

Sa maong lugar makita ang giladlad sa City Agriculture Office nga nagkadaiyang produkto sa kaumahan nga naglakip sa mga lagutmon nga kamoteng kahoy, kamote, gabi ug mga utanon sama sa kamunggay, talong, petchay, alogbate ug uban pa.

Gihimo usab sa City Agriculture office ang pagbukas sa pagsaulog sa Nutrition Month karong tuiga pinaagi sa pagpanghatag og libreng seedlings alang niadtong nagtinguha sa pagtanom.

Ang City Nutrition Office nanghatag og libreng gatas alang ngadto sa mga buntis nga mga inahan sa dakbayan.

Gipahinumdoman ni Mandaue City Mayor Jonas Cortes ang mga Mandauehanon sa kamahinungdanon sa nutrisyon alang sa himsog nga panglawas.

Ang pagbukas sa unang adlaw sa Nutrition Month Celebration gipangulohan ni Mayor Cortes nga gitambongan usab ni bise mayor Glenn Bercede ug pipila ka mga sakop sa konseho nga naglakip kanila ni Jun Arcilla, Jimmy Lumapas, Oscar Del Castillo, Jen Del Mar, Cynthia Cinco Remedio, ug uban pa. (BANAT NEWS)