Mga polis bawal mag-moonlighting

CEBU, Philippines — Si Philippine National Police Chief Police General Rommel Marbil mimando sa tanang polis nga motutok sa public safety sa komunidad ug dili lang sa mga pribadong indibidwal human adunay nasakpang mga sakop sa Special Action Force nga nagsilbing bodyguards sa Chinese citizen nga nagpuyo sa usa ka exclusive subdivision didto sa Alabang, Muntinlupa City.

Matud ni Marbil nga ang unang trabaho sa kapulisan mao ang paghatag og seguridad sa katawhan ug kanunay nga naa ilahang presensiya.

Subay niini, si Police Lieutenant Colone Gerard Ace Pelare, tigpamaba ni Police Regional Office (PRO)-7 Regional Director Brigadier General Anthony Aberin nga wala nila gitugot nga dunay police nga mo-duty isip escort sa usa ka indibidwal.

Giklaro ni Pelare nga ang Police Security Protection Unit(PSPU)-7 lamang maoy gitahasan para sa ingon niini nga trabaho.

 “Atong ibutang sa kadalanan ang atong kapulisan ug dili ta mosugot og kining bisan unsa nga matang nga ma consider nato nga moonlighting that is not authorized and we will never allow that because what we want ang police nga dapat naa sa kadalanan dapat tua gyud didto,” sigon ni Pelare.

Ang PSPU-7 maoy mohatag og escort sa indibidwal nga mangayo niini apan dili basta-basta ihatag ang escort sanglit dunay mga guidelines sa kinsay angay makadawat og escort. (BANAT NEWS)