1,500 ka polis inisyal nga giandam alang sa Palarong Pambansa

CEBU, Philippines — Anaa sa 1,500 ka mga police personnel ang inisyal nga giandam sa Police Regional Office(PRO)-7 aron mobantay sa Palarong Pambansa 2024.

Suma pa ni Police Lieutenant Colonel Gerard Ace Pelare, tigpamaba sa Police Regional Office nga ang maong mga police walay laing buhaton kun dili ang paghatag og seguridad sa mga delagado sa Palarong Pambansa.

Tulo ka areas ang gipaneguro sa PRO-7 nga luwas gyud, kini mao ang venues sa mga duwa, billeting area sa mga delagado ug kadtong mga lugar nga posibleng suroyan.

“Kanang atoang gi-estimate nga 12,000 nga participant that will actually to our minds will double the numbers kay naa man nay mga kuyog usually sila unya kining tanan atong gi-consider”, matod ni Lt. Col. Pelare.

Mando ni PRO-7 Regional Director Brigadier General Anthony Aberin nga seguraduhon nga ang tanang areas nga posibleng adtuan dunay tukmang security coverage.

Duha ka adlaw sa dili pa ang kalihukan mag full alert status ang PRO-7.

Samtang 99.9porsyento nang andam ang Dakbayan sa Sugbo sa umaabot nga palarong pambansa nga salmotan sa 12mil ka mga delegado sa nagkadaiyang dapit sa nasod.

Sa press conference kagahapon Hulyo 1, gipadayag ni acting mayor Raymond Alvin Garcia nga minor details na lang ang ilang gi finalized, tungod kay nahuman na ang infrastructure ug logistical nga aspeto.

"We are almost 100 percent prepared for this event. The infrastructure is ready, and we are now focusing on the finer details such as finalizing the lineup of performers," suma pa ni Garcia.

Samtang mopada usab og invitation ang siyudad ngadto kang suspended mayor Michael Rama.

Matud pa ni Garcia nga iya usab nga gitan-aw ang dakung kontribusyon ni Rama sa pagpangandam sa Palaro ug angayan lang nga motambong siya sa kalihukan.

Samtang gihan-ay na sa DepEd ang ilang command center sulod sa Cebu City Sports Center, gani namontar na ang kapin sa 50 ka mga TV Monitors alang sa ilang palaro live streaming room diin makita ang mga venue sa nagkadaiyang duwa.

Suma pa ni Dr. Adolf Aguilar, Assistant Division Supt. DepEd Cebu City nga hapit na nila makab-ot ang 100 percent prepared status. (BANAT NEWS)