Tara Basa, Tutoring Program, gilusad sa DSWD-7

CEBU, Philippines — Nipasiugda ang DSWD Field Office 7 og pre-deployment orientation ngadto sa 704 ka tutors ug Youth Development Workers (YDWS) gikan sa Cebu Normal University (CNU) niadtong Hunyo 30, isip pagpangandam sa ilang deployment sa "Tara, Basa! Tutoring Program" sa Cebu City sa Hulyo 1, 2024.

Kining sesyon sa pagpangandam nagtumong sa paghatag ug komprehensibo nga giya ug mga pahinumdom sa mga tutors ug YDWs sa dili pa sila mosugod sa ilang mga tahas sa tutorial ug parenting sessions.

Atol sa oryentasyon, ang mga tutor ug YDWs nakadawat og mga detalyadong briefing ug mga review sa ilang mga tahas ug tumong, ug mga pamaagi sa pagtudlo para sa batang dili makamaong mobasa.

Lakip usab gitudlo kanila ang pag-obserbar sa Code of Conduct for Child Protection Policy sa maong ahensya sama sa pagmentinar sa propesyonal nga limitasyon, pagtahod sa mga katungod sa mga bata, ug pagtaho dayun sa mga otoridad kun mabutang sa peligro ug makompromiso ang kaluwasan sa bata.

Ang mga tutors ug YDWs gihatagan og mga basic kits sama sa kamiseta, payong, mga gamit sa pagtudlo, ug mga guidebook nga gisulod sa tote bag ug pre-deployment allowance para sa 20 ka adlaw nga mga sesyon apil na ang Nanay-Tatay Teacher Sessions alang sa mga ginikanan sa mga estudyante.

Ang 704 ka tutors ug YDWs ideploy sa 68 ka mga publikong eskwelahan sa elementarya sa dakbayan sa Sugbo. Target sa programa nga makatabang sa 4,581 ka mga tinun-an ug mga ginikanan. (BANAT NEWS)