Nabuang sa scatter nisakiyo sa P300 mil
CEBU, Philippines — Gipangita karon sa kapolisan ang usa ka lalaki nga giingong nailhan nga naungo na sa online gambling nga ‘scatter’ ug ang kakunsabo niini sa paglungkab sa usa ka balay diha sa Purok Central 2, Barangay Tangke, sa Dakbayan sa Naga pasado alas 7 sa gabii niadtong adlaw nga Domingo, Hunyo 30,2024.
Ang gipangita mao ang estambay sa maong dapit nga nailhan na sa kapolisan ug kini adunay kapuyo ug silingan ra sa biktimang si Christy Paradillo Vergara, 52.
Matud pa sa imbestigasyon sa Naga City Police Station nahitabo ang pagpanglungkab alas-7 kapin ang takna sa gabii.
Matud pa sa report nakabantay ang biktima nga ang iyang kwarta nga gibutang sa drawer nawala na maong misumbong kini dayun sa kapolisan.
Dali nga miresponde ang kapulisan ug nasuta nga nakasulod ang suspek pinaagi sa pagguba sa bintana sa maong balay pinaagi sa pagputol sa kabilyang rehas ug gibuak ang bildo nga bintana.
Matud pa ni Police Staff Sergeant Crispin Amaquiton base sa ilang pagsukit-sukit ug pagpangutana sa mga tawo sa lugar ‘nabuang’ sa scatter ang suspek.
“Matud pa sa initial nga imbestigasyon anaay duha ka spotters, pero wala pa nato na identified. Pero ongoing pa man ang atong imbestigasyon, pero basig naa pay mga possible other witness nga makasulti nga confirm jud nga duha ang suspetsado,” sigon ni Amaquiton. --John Mark P. Dejito (BANAT NEWS)
- Latest
