Kagamhanan sa dakbayan giawhag hingusgan ang lakang batok dengue

CEBU, Philippines — Giawhag karon sa konseho sa dakbayan sa Sugbo ang kagamhanan sa dakbayan nga hugtan ang mga lakang batok sa dengue aron maandam sa posibleng pagsaka niini panahon sa ting-ulan.

Atol sa labing ulahing regular nga sesyon sa konseho sa dakbayan, pipila ka mga resolusyon ang giaprobahan sa konseho nga gisang-at nila ni Konsehal Jose Lorenzo Abellanosa ug Rey Gealon.

Ang resolusyon ni Abellanosa nag-awhag sa Cebu City Health Department (CCHD) nga mosumitir og report sa konseho kalabot sa mga lakang nga ipatuman karong ting-ulan aron matubag ug mamenosan ang posibleng pagsaka sa kaso sa dengue sa dakbayan.

Sa susama nga resolusyon, giingon nga ang dengue fever usa ka "endemic nga sakit” nga usa sa hulga sa kahimsog sa publiko.

Si Abellanosa miingon nga ang grabeng kainit ug huwaw dala sa El Niño phenomenon miresulta sa pagsaka sa kaso sa dengue ngadto sa 95% sa unang lima ka bulan sa 2024.

Sa maong mga figures, ang dakbayan sa Sugbo maoy adunay pinakadaghang kaso sa dengue nga adunay 409 ka kaso sa tri-city area sumala sa Department of Health (DOH) Region VII. Giaprobahan usab sa konseho ang resolusyon ni Gealon nga naghangyo sa mga opisyal sa barangay, pinaagi sa Association of Barangay Councils, nga mopagawas ug mga pasidaan batok sa WILD nga mga sakit aron ang publiko mag-amping ug epektibong mapugngan ang pagkatap sa maong mga sakit.

Ang resolusyon ni Gealon nag-ingon nga ang "WILD" maoy acronym sa Water and food-borne diseases, Influenza, Leptospirosis, ug Dengue.

Niadtong Mayo 29, 2024, gideklarar sa PAGASA ang pagsugod sa ting-ulan diin adunay pahimangno si Health Education and Promotion Officer nurse Joenes Jereza ngadto sa publiko nga mag-amping batok sa "WILD" nga mga sakit.

Dugang pa niya nga pipila sa mga sakit nga dala sa tubig ug pagkaon nga angay bantayan mao ang kalibanga ug typhoid fever, nga mahimong tungod sa kontaminado nga pagkaon ug tubig tungod sa natural nga mga panghitabo sama sa pagbaha ug bagyo. (BANAT NEWS)