Pagtaud og solar panel sa gym sa brgy Sambag 2 gikwestyon
CEBU, Philippines — Gikuwestiyon sa Cebu City Council ang proposal nga kapin sa P2M nga pagtaod sa Solar Panels sa gym sa Brgy. Sambag 2 tungod sa pagka impraktikal niini.
Naggikan ang diskusyon sa resolution nga gisang-at ni Konsehal Jerry Guardo nga Chairman sa Committee on Infrastructure nga naglaraw nga matagaan og authority si Acting Mayor Raymond Alvin Garcia sa pagsud og kontrata uban ang SBD Builders.
Ang maong proyekto nakatutok sa provision sa Renewable Energy Based Electrification sa Brgy. Sambag 2 sa dakbayan nga mokabat sa kapin P2.5M base sa Bids and Awards Committee (BAC) nga resolution niadtong Pebrero 26, 2024.
Wala usab giaprobahan sa milabayng session ang resolution tungod wa pa matuki kun asa kuhaon ang pundo. Apan matud ni Guardo, kuhaon ang pundo sa Department of Interior and Local Government (DILG) aron mataod ang solar panels sa Brgy Sambag 2 gymnasium.
Gikuwestiyon sab ni Konsehal Nestor Archival nga Minority Floor Leader ang kalahian sa magasto sa bayad sa kuryente ug ang pagtaod sa panels.
Dugang niya, posibleng hangtod 2 o 3 ka tuig lang ang maabtan sa panels ilabi na kung di mataod og tarong.
"Now kung atong bayranan is only like 3,000 in one year...there would be P36,000. And butang ta lang 5 years, that is P180,000 nya if mugasto tag P2.5 million basin sayop ta ani," saysay ni Archival.
Giklaro ni Guardo nga gikan sa DILG ang pundo nga deretso sa barangay.
Apan matud ni Archival mas makabarato ang gobyerno kung magbayad sa kuryente itandi sa pagtaod sa solar panels.
Suma ni Cebu City Councilor Noel Wenceslao nga kanhi kapitan sa brgy. Sambag 2 nga adunay daycare ug health center sa barangay ug suma niya, 20 ka tuig ang nakalabay moabot sa P8,000 ang ilang bill.
"With this project, it will not only energize our gymnasium, but it will also include the health center, and the daycare center kay murag these are adjacent properties," matod ni Wenceslao.
Suma pa usab ni Konsehal Jocelyn Pesquera, kinahanglang naay warranty nga malakip sa MOA.
Nasayran 2 ka barangay sa dakbayan ang napondohan sa DILG ug usa na ang Brgy. Ermita. Nasabotan sa konseho nga ma-comply ang tanang ammendments sa di pa kini aprobahan sa konseho. (BANAT NEWS)
- Latest
