Banauan nalangkat ang ikalimang pwesto sa Aliwan

CEBU, Philippines — Ang  Banauan Cultural Group (BCG)nga maoy nagrepresenta sa  Sinulog Festival sa  Dakbayan sa Sugbo , maoy nakakuha sa ikalima nga puwesto sa  Street Dancing Competition sa Aliwan Festival 2024 nga gipahigayon sa  Pasay City niadtong Sabado sa gabii.

Suma pa sa choreographer sa  BCG nga  konsehal sa Barangay Guadalupe nga si Cliff Yunson Racuya nga gikalipay niya og maayo ang resulta ug dakong garbo alang kaniya nga makasalmot ang iyang grupo og usa ka prestihiyosong festival.

Matud pa ni Racuya nga ang paghalad ngadto sa  Balaang Bata nga si Sr. Sto. Niño ug Birhen sa Guadalupe sa Sugbo maoy inspirasyon sa Banauan Cultural Group alang sa pagsalmot nila sa Aliwan Festival  2024.

Gani  ang mga imahe niini kay giplastada  gyud  atol  sa ilang dance presentation.

 Lakip sa nisaksi sa Aliwan Festival 2024 agi og pagsuporta sa grupo  mao  ang duha ka mga konsehal sa Dakbayan sa Sugbo nga sila si Jocelyn Pesquera ug  Francis Esparis, nitambong pud ang kapitan sa Brgy. Guadalupe nga si Apol Gacasan -Enriquez.  Ang ubang mananaog mao ang Dinagyang Festival sa Iloilo City  (champion), Tultugan Festival sa Iloilo Province (2nd) , Meguyaya Festival sa  Upi, Maguindanao del Norte ( 3rd) , - Niyogyugan Festival sa Quezon Province (4th).

Si Racuya miingon nga mao kini ang labing una ug katapusan nila nga pagsalmot sa Aliwan Fiesta 2024 apan dako ang ilang pasalamat sa Kagamhanan sa Siyudad sa Sugbo sa pagsuporta kanila.

Lakip sa nipadangat og suporta sa grupo mao si Kongresista Eduardo Rama.

Samtang dunay lima ka "runners-up" sa Aliwan  nga gilangkoban kini sa Antipolo Maytime Festival  sa  Antipolo City , Kaogma Festival sa Baao, Camarines Sur, Panagbenga Flower Festival sa  Baguio City ,Halamanan Festival sa Guiguinto, Bulacan ug Cagsawa Festival sa Daraga, Albay. (BANAT NEWS)