Niluwas sa na-trap, nalumos

CEBU, Philippines — Patay ang 28-anyos nga lalake nga duha ka buwan pa lang naminyo human misuway kini og luwas sa iyahang 15-anyos nga igsuong babaye nga na-trap sa spring nga ilahang gikaligoan sa Barangay Danicop, Lungsod sa Antequera, Probinsiya sa Bohol, Biyernes sa gabii, Hunyo 28, 2024.

Ang mga batan-ong nag-edad og 18-anyos, 16-anyos nga pulos lalake ug ang 15-anyos nga babaye mga residente ra sab sa naasoy nga lugar.

Matud ni Jacinto Quimson sa Local Disaster Risk Reduction and Management Office sa Lungod sa Antequera, ang grupo nanulod sa sudlunon nga bahin sa Tubang Spring kansang agianan kinahanglang sawumon ug suongon aron makasulod sa langub.

Lisod kining lutsan kay ini’g makasulod sa maong langub lawom kaayo ang tubig niini ug sa unahan pa ang mabaw nga bahin nga maoy gipundohan sa tulo.

Pulos kahibawo manglangoy ang maong mga batan-on ug nasuhito na sila sa maong sapa nga mao say tinubdan nila sa ilang mainom nga tubig.

Apan ang nakaapan lang, gikatahong gibati og gahadlok ang 15-anyos nga babaye nga molangoy balik pagawas hinungdan nga giunungan kini sa duha niya ka mga kauban hinungdan nga sila na-trap sa sud ug naabtan og gabii.

“Didtong dapita safe ra sila, ang naka kuan lang kay dili sila makalusot tungod sa babaye nga na-trauma. Pero og sila ra duha nga lalake okay ra makabalik ra sila…Na-trauma siya sa ila sigurong giagian then lisod man gud ang trauma kung dili nimo i-stress de briefing,” sigon ni Quimson.

Ang nahitabo sa maong mga batan-on na report dayon sa otoridad human wala na sila mogawas maong nihimo og search and rescue operation ang kabomberohan ug kapulisan apil na ang disaster team sa Antequera.

Dihang nakabantay ang duha ka batan-ong lalakeng adunay suga nga giiwag-iwag sa mga rescues, dali silang nanglangoy paggawas sa gamay’ng agianan sa langub sa maong sapat ug gibilin ang 15-anyos nga babaye.

Ang 28-anyos nga igsuon sa babaye nga wala mahimutang sa nahitabo sa iyahang manghod nihangyo nga maoy mo-rescue niini nga gitugutan sab.

Gihigtan og pisi ang lawas sa 28-anyos ug gisultihan nga kun magkalisod birahon ang pisi.

Apan nilabay nalang ang 12 minutos wala’y lihok nga nahitabo ug gatuo sila nga naabot na kini sa nahimutangan sa iyahang manghod.

Apan tungod sa kadugay, wala na makapaabot ang kabomberohan maong gibira nila ang pisi ug didto nakita ang 28-anyos nga lalake nga wala na magginhawa, dali kining gitabang ug gidala sa ospital apan gideklarar nga dead-on-arrival.

Gituohan nga niungot kini sa gamay nga baba sa langub sa ilawom hangtud nalumos.

Gumikan kay dili man sila eksperto sa diving ug wala sab sila’y igong kahimanan maong nagpatabang sila Philippine Coast Guard.

Dihang nakasulod ang mga personnel sa PCG sa nahimutang sa babaye ilahang kining gidasig pagkuyog kanila paggawas apan nagdumili gihapon kini kay nalisang gihapon nga moagi sa lawom nga bahin sa sapa ug mosawom aron makasuong paggawas sa baba sa langub.

Kaunom ka higayon nga nagbalik-balik ang rescuers sa sud aron sa paghangyo kaniya, gipakaon pa kini og chocolate ug gipadungog sa tingog sa iyahang inahan nga gi-record.

Pasado ala-1 sa kaadlawon kagahapon didto hingpit nga na rescue ang babaye nga karon naa sa tambalanan human kini napasanong sa PCG pagkuyog kanila.

“Sa last attempt namo nga wan-a hapit na mahurot ang lima ka oxygen mabaw ra gyud unta pero tungod sa balik ug balik nga pag convince sa babaye nga mouban unta pero mobalik. So mao ‘tong nahitabo pero right after medyo natagaan na og kusog kay gipakaon og chocolate siguro nadungog to niya among gipakuan sa megaphone ang tingog sa iyahang inahan basin nadungog so niuban that was past 1 o’clock na in the morning,” asoy ni Quimson.—IBM BANAT NEWS