Opisyal sa UN Tourism nihagit sa pag-establisar og culinary center
CEBU, Philippines — Giawhag sa labaw nga opisyal sa United Nations Tourism Organization (UN Tourism) ang mga stakeholder sa Sugbo nga mo establisar og gastronomy ug culinary center.
Sa iyahang mensahe, si UN Tourism Secretary-General Zurab Polikashvili nihagit sa mga stakeholder nga mohimo sa maong center.
Si Polikasvili nipadayag sa maong mensahe atol sa paglusad sa UN Tourism Regional Forum on Gastronomy in the Asia-Pacific.
“And what is my proposal is to leave a legacy… to create something an education center or gastronomic center here in Cebu. We have to do it and it has to be a legacy”, matud ni Polikashvili.
Ang UN Tourism Regional Forum on Gastronomy in the Asia-Pacific maoy unang programa nga gilusad pag-promote sa culinary ug food culture sa Asia-Pacific.
Kagahapon ang sobra sa 300 ka delegado sa United Nations Tourism Organization (UNTO) gisuroy sa Kapitolyo diha sa pipila ka lungsod sa probinsiya diin anaa ang mga sikat nga tourism destinations sama sa Camotes Islands, Argao ug uban pa.
Pinaagi sa Suroy-Suroy Sugbo nga kalihokan nahatagan og kahigayonan ang mga delegado nga makasinati sa kultura sa Sugbo ug makatilaw sa lain-laing pagkaon ug delikasiya nga gipasigarbo sa kalungsoran.
Gihulagway sa UN Tourism ang gastronomy tourism nga pamaagi sa pag-promote ug pagsabot sa nagkadaiyang kulutra sa mga ugar ug pagdala sa mas hiniusa nga mga tawo ug tradisyon.
Pinaagi niini, ang pagkaon nga gipasigarbo sa usa ka lugar usa sa gitan-aw sa pagdani sa mga turista nga mosuroy sa maong destinasyon. — BDB BANAT NEWS
- Latest
