20 ka babaye na-rescue sa NBI

CEBU, Philippines — Tulo ang nasikop ug 20 ka babaye ang na-rescue sa National Bureau of Investigation District Office uban sa mga nagkadaiyang ahensiya lakip niini ang Inter-Agency Council Against Trafficking (IACAT)-7 ug Department of Social Welfare and Development-7 atol sa gipahigayong simultaneous entrapment and rescue operation nga niadtong Hunyo 21, 2024 sa Dakbayan sa Mandaue.

Ang duha sa mga nadakpan maoy tag-iya sa patigayon ug ang laing usa mao ang “mamasang”.

Gironda sa NBI ang duha ka massage parlor ug usa ka KTV bar nga gikatahong nalambigit og sexual exploitation sa mga kababayen-an.

Atol sa maong operasyon tulo ang nadakpan ug adunay 20 ka babaye ang na- rescue nga giingong gihimo isip mga customer care assistant ngadto sa mga parokyano nga mobisita sa maong mga patigayon.

Gikataho nga ang maong KTV bar nilambigit sa prostitusyon sa ilang mga trabahante.

Ang mga kustomer giingong mobayad ug P600 alang sa unlimited nga inom og ilimnong makahubog ug ang mamasang mao ang mopaila-ila sa ilang mga customer care assistant nga mga babaye ngadto sa mga kustomer.

Atol sa gihimo nga operasyon, ang undercover agent sa NBI maoy ni-arrange sa tulo ka customer care assistant nga manihapon sila sa usa ka motel ug human sa pagbayad gidala ang maong mga babaye sa duol nga safe house uban sa taga DSWD nga maoy naghatag og de-briefing kanila.

Atol sa pagsulod sa mga ahente sa NBI sa bar na-rescue ang mga babaye ug nasikop usab ang giingong mamasang.

Ang NBI-CEBDO nipasaka na og kasong human trafficking in person batok sa mga dinakpan. (BANAT NEWS)