Nagpatay sa iring ikiha

CEBU, Philippines — Base sa kuha sa footage sa closed circuit television makita ug madungog nga gisugo sa usa ka lalaki ang usa ka bata sa pagtawag sa iring aron pakan-on diin ang maong lalaki nag-andamog dos por dos nga kahoy nga gamiton sa pagpospos sa iring.

Pipila ka segundo nigawas ang iring gikan sa usa bodega sa iyang amo ug niduol ngadto sa anak sa suspetsado diin madungog sa video nga gipapahawa niini ang bata dayon aksyon na og pospos ngadto sa iring.

Nakita nga nagkirig-kirig ang iring human kini maposposi ug nagkadugo apan bisan pa niini padayon gihapon kini nga giposposan sa lalaki ug pipila ka minuto wala na maglihok ang iring.

Ang maong pagpamospos sa iring nasaksihan sa tag-iya niini nga si John Michael Boholst diha sa iyang monitoring sa cellphone nga kuha sa ilang CCTV sa ilang bodega nga himoanan og silhig.

Matud ni Boholst nga Hunyo 11, 2024 nag-deliver siya niadtong higayona dihang nahitabo ang krimen.

Ang suspetsado sa pagpatay s airing silingan ra usab nila ni Boholst.

Si Boholst nipadayag nga nasakitan siya sa nahitabo sa iyang iring tungod kay upat na kini katuig sa ilaha nga iyang giatiman human kini niya napunitan sa dalan ug gisakop.

Gihulagway ni Boholst nga pinangga kaayo niya ang maong iring diin kanunay kini sa ilang tindahan ug usab kini og tabang sa pagbantay matag gabii.

Ang nahisgutang iring nga gihinganlan og Menggay niadtong buwan lang sa Abril niining tuiga nagsugod ug kuyog sa iyang anak padulong sa bodega kinsa atbang ra usab sa ilang tindahan.

Nipadayag si Boholst nga gusto niya nga mahatagan og hustisya ang kamatayon ni Menggay ug human sa ilang kataposan nga hearing sa barangay andam siya nga mo sang-at og kaso batok sa suspetsado.

Gipadayag ni Boholst nga pinangga kaayo si Menggay sa ilang pamilya.

Ang Banat News nianha sa balay sa suspetsado aron makuhaan sa iyang habig apan wala kini diha sa ilang babay.

Nasayran nga ang suspetsado nasuko ni Menggay tungod kay giingong namaak kini sa ilang iring nga namatay usab.

Apan gihimakak ni Boholst ang maong pangangkon tungod kay giingong nasaypan lang si Menggay sa suspetsado.

Ang Hepe sa Talisay City Police Station Police Lieutenant Col Epraem Paguyod nagkanayon nga nihimo na sila og pasiuna nga pakisusi kalabot sa hitabo ug niawhag sa pet owner nga modangop sa ilang buhatan ug mopasaka og kaso batok sa suspetsado. (BANAT NEWS)