Tulo ka babaye nangawat sa tindahan gisikop

CEBU, Philippines — Nagtingkagol sa prisuhan ang grupo sa kababayen-an nga gituohang midayo sa Sugbo aron mamiktima sa Palarong Pambansa 2024.

Nadakpan ang grupo dihang nasakpan nga nag shopping nga wala'y bayad-bayad sa usa ka convenience store sa L. Gabuya Street corner Col. Cabreros Street, Barangay Basak San Nicolas, siyudad sa Sugbo ala una sa hapon kagahapon, Hunyo 26, 2024.

Ang mga dinakpan mao sila si Angel Ferrer Florentino, 28 anyos; Netchel Andrade Hilado, 33 anyos ug Raquel Billos Bejemeno, 53 anyos, ang tulo pulos taga Silay City, Probinsya sa Negros Occidental.

Suma pa ni Melodina Vergara, tag-iya sa tindahan nga gikawatan sa mga suspetsado nga alas 6:15 sa gabii sa adlaw'ng Martes, nahibulong ang iyahang tindera nga nahawan ang ilang mga baligya hinungdan nga ilang gitan-aw ang CCTV.

Didto nakit-an ni Vergara ang lima ka tawo apil ang tulo nga nadakpan nga nisulod sa tindahan diin duna sila'y gibilin nga dakong bag sa gawas.  Giingong kaupat ka higayon nga nagbalik-balik og kuha og mga baligya ang mga suspetsado diin ang tanan niabot og P15, 000.

Aron malipat ang tindera ang usa sa mga dinakpan kunuhay nagpa counter og tulo ka items unya diay ang mga kuyog niini gipangsulod na sa daster ug bag ang mga gikuha nga mga grocery items.

Si Police Major Efren Diaz Jr., Hepe sa Police Station 11 sa Cebu City Police Office miingon nga midangop sa ilang buhatan ang biktima hinungdan nga nihimo sila og follow up operation ug naatlan gyud nila ang mga suspetsado nga nibalik sa tindahan aron mangawat na sab ug didto nadakpan sila sa kapolisan.

Gi-adto sab sa kapolisan ang boarding house nga gipuy-an sa mga suspetsado sa Barangay Duljo Fatima ug didto nakita ang mga bag-ong gamit nga naa pay tag nga gipangkawat sab sa mga suspect.

Wala sab gisalikway ni Major Diaz ang posibilidad nga ang mga suspetsado nagplano nga maghimo og dautan atol sa Palarong Pambansa 2024 ilabi na nga dili sila taga Sugbo. Gisuwayan og kuha sa ilang habig ang mga suspetsado apan nagdumili sila sa pagtingog. (BANAT NEWS)