Super Family Health Center buksan na karong Biyernes

CEBU, Philippines — Buksan na karong Biyernes sa publiko ang Super Family Health Center diha sa barangay Apas dakbayan sa Sugbo.

Ang maong pasilidad mao kini ang una sa siyudad sa Sugbo nga makatabang sa pag decongest sa mga pampubliko nga tambalanan ug aron ang mga residente sa mga barangay sa North District dili na moadto sa layong lugar aron mopahimulos sa libre nga serbisyo sa panglawas.

Matud pa ni Dr. Grace Velez, ang mangulo sa SFHC ang maong facility bukas 24 oras ug makahatag og comprehensive medical services, konsulta ug pagsusi sa mga sakit sa pasyente.

Ang super health center maoy mother health center nga maghatag ug kompleto nga serbisyo gikan sa medical consultations ngadto na sa laboratory services ug moserbisyo usab kini sa mga pasyente gikan sa kabukiran sa siyudad sa Sugbo. Ang SFHC magtanyag usab og mga minor surgeries ug laboratory services sama sa CBC, urinalysis, x-ray ug uban pa.

Kahinumduman niadtong Hunyo 11 si acting Cebu City Mayor Raymond Alvin Garcia nimando sa City Health Department nga paspasan ang pagbukas sa SFHC human siya nisusi sa maong facility.

Tinguha sa acting mayor nga mabuksan na ang pasilidad tungod kay duha ka tuig na ang nilabay sukad giturn over kini sa Department of Health ngadto sa dakbayan. (BANAT NEWS)