Kurapsyon sud sa CDRRMO gibutyag sa mga kawani

CEBU, Philippines — Siyam ka mga kanhi ug kasamtangang kawani sa Cebu City Disaster Risk Reduction and Management Office ang nidangop sa buhatan ni  KonsehalPastor Jun Alcover ang misumbong sa matud pa kinawatay ug gasolina, krudo ug uban pa diha sa ilang departamento.

Sa press conference kagahapon sa buntag, si Alcover miingon nga niluwat og affidavit bahin sa ilang reklamo ang maong mga kawani batok sa pipila ka mga tawo sa ilang buhatan.

Sumala pa sa mga alegasyon, duna nilay gipangayoan og bahin sa ilang sweldo,  dunay mga kawatan og gasolina ug krudo aron ibaligya o gamiton sa personal nilang mga sakyanan.

Si Alcover miingon nga iyaha iduso ngadto sa buhatan ni acting Mayor Raymond Alvin Garcia ang maong reklamo aron aksyonan.

Kung dili kini dayon maaksyonan iyahang ipatawag sa konseho ang siyam ka mga reklamante aron didto ipawadwad ang ilang mga nahibaw-ang iregularidad sa mga gipangreklamong mga kawani.

Giklaro ni Alcover nga kining iyang gibuhat pagsuporta kini sa kawsa ni Garcia nga malimpyohan ang City Hall gikan sa mga hiwi nga mga kawani nga nangawkaw sa kaban sa katawhan.

Sumala pang Alcover seryuso kini nga alegasyon ug adunay mga naglambigit nga mga tawo. Ug nagtuo siyang duna pay ubang mga kawani sa siyudad nga susama og binuhatan.

Sweldo gipahakan

Usa sa mga reklamante nibutyag nga atol sa iyang sweldo gikuhaan siya og kwarta human giingong para daw ipalit og kagamitan sa CDRRMO ug gigamit ang pangalan sa ilang labaw nga si Harold Alcontin nga maoy nagmando.

Ang maong reklamante nitug-an nga adunay usa ka tawo nga gitumbok apan gipugngan usa ning tigbalita samtang wala pa makuhai sa iyang habig.

Dugang pa sa maong reklamante, base sa iyang kasayuran sukad pa niadtong panahon sa Covid-19 nagsugod kining pagpangawat og petrolyo diha sa CCDRMO.

Samtang si Alcontin sa iyang bahin nibutyag nga mohimo sila og imbestigasyon kabahin niini kay wala siya masayod bahin niini ug wala say mga sakop niya misumbong nganha kaniya.

Si Alcontin, nitug-an wala pa gayud siya masayod kung asa dapit nahitabo ang kinawatay tungod kay estrikto man ang pagpagawas og suplay sa petrolyo sa Department of General Services.

Apan siya nipadayag nga bukas siya ug ang iyang buhatan alang sa buhatong imbestigasyon.

Alokasyon gihunong

Si Garcia pagkasayod sa maong alegasyon, nikanselar sa government gas allocations sa tanang sakyanan sa siyudad ug sa mga barangay sugod kagahapong adlawa, Hunyo 18, 2024.

Giklaro usab ni Garcia, ang mga emergency vehicles sama sa ambulances, fire response vehicle, ug police patrol cars lamang maoy exempted sa cancellation.

Gitug-an ni Garcia, kadtong mga buhatan nga maapektahan sa kamanduan mahimo ra mopadala og suwat sa iyang buhatan ug mohatag sa pagpasabot nganung dili sila angay maapil sa mga gidid-an og alokasyon sa petrolyo. Gimandu usab ni Garcia ang pagpahigayon og imbestigasyon ug gusto sab niyang makaatubang ang mga reklamante bahin niini. (BANAT NEWS)