Guba Community Hospital nahatagan nag building permit

CEBU, Philippines — Human sa unom ka tuig, gipahibalo ni acting Cebu City Mayor Raymond Alvin Garcia kagahapon sa buntag sa press conference nga tambalanan sa Guba anaa nay building permit.

Matod ni Garcia sa pakignabi sa media kagahapon nga gawas sa building permit gilihok na ang occupancy permit niini aron magamit na ang maong pasilidad.

"After 6 years, naa na gyud siya building permit, they are working now on the occupancy permit," matud pa ni Garcia.

Ang mayor nipadayag nga gipanugon na niya sa pangulo sa  Office of the Building Official (OBO) Architect Catalannga e-prioritize kini aron magamit na ang maong tambalanan.

Sumala pa sa mayor kung mahuman ang tanan kinahanglanon sa kontraktor maiisyuhan na kini ang maong giingong occupancy permit sulod lamang sa 24 oras.

"Basta mahuman nang tanan requirements sa kontraktor, then there's no reason within 24 hours, ila nana ma-issue," matud pa niya.

Niadtong Hunyo 4, 2024, ang OBO mipahibalo nga walay building permit ang pagtrabaho sa maong tambalanan, dugay sab kini nga na-isyuhan og notice of illegal construction ug work stoppage order.

Hinuon si Catalan miingon nga kun makompleto lang gyud sa kontraktor ang mga rekisitos, di ra abtan og usa ka oras mapagawas dayun ang mga gikinahanglang permits. Niadtong Disyembre 5, 2023 ang Alsher Construction nga maoy kontraktor sa proyekto misumitir og explanation letter ngadto sa OBO, sila miesplikar nga ikaupat na sila nga kontraktor nga nitrabaho niini.

Niadtong 2021 nahatagan sila og resumption order aron padayunon ang pagtrabaho niini. Karon gipasalig nila nga humanon nila ang application alang sa permits.

Niadtong Mars 6, 2024, ang CLO ni-isyu og resolution nga nag-awhag sa contractor nga mo-comply sa building permit, uban sa occupancy permit gikan sa OBO sulod sa 60 ka adlaw.

Gibutyag usab ni Garcia nga ang bag-ong medical director sa Guba Community Hospital mao si Dr. Grace Valdez. "I've already appointed a new medical director for Guba Hospital in the person of Dr. Grace Valdez," matud pa ni Garcia.

Ang maong tambalanan makaserbisyo na unya sa sunod bulan kun mahuman na og instalar ang mga medical equipment.

Ang guba hospital extension kini sa Cebu City Medical Center sa kabukiran sa siyudad sa Sugbo. — Jessa Grezil S. Bacus (BANAT NEWS)