Flood control taskforce subling gipalihok sa Talisay

CEBU, Philippines — Subling gipalihok sa dakbayan sa Talisay ang flood control taskforce nonot sa nasinate nga mga pag-uwan.

Niadtong miaging semana, girespondehan nila ang highway sa Barangay Linao human nakasinate og pagbaha.

Si Edwin Nierves, pangu sa flood control taskforce nihulagway nga ang mga basura nga nakabara sa kanal ang hinungdan sa pag saka sa tubig.

Hinuon human nila gipang haw-as ang basura mihubas rasab dayon ang tubig nga nakapabaha sa karsada.

Nanawagan si Nierves ngadto sa katawhan ilabi na sa mga mamaligyaay sa merkado sa Tabunok nga hiposon og tarong ang mga basura aron di kini magpasad sa karsada ug masulod sa mga kanal.

Samtang si Gary Togonon, pangu sa Aksyon Agad Team nibutyag nga naka standby na sila kanunay sa higayon nga mobunok ang uwan aron makatabang sa paghubas sa tubig baha.

Ang highway sa Barangay Bulacao mao sab ang ilang bantayanan kun mobunok ang uwan.

Dali usab nga moresponde ang Aksyon Agad Team sa tawag sa katawhan aron sa paghawan sa karsada. (BANAT NEWS)