El Niño nagbilin og P1.7 nga danyos sa agrikultura sa CV

CEBU, Philippines — Moabot ngadto sa P1.7 bilyones ang namugna nga danyos sa El Niño sa mga pananom ug hayopan sa Central Visayas sumala pa sa Department of Agriculture-7.

Ang dakong pahat niini mga High Value Crops nga gilangkoban sa mga utanon, lamas, prutas ug uban pa.

Sa datos sa DA-7 moabot ngadto sa P1,764,428,618.00 ang kinatibuk-an danyos sa pananom ug hayopan nga natala sukad sa Pebrero hangtud Hunyo niining tuiga.

Ang P139.1milyones  mga humay; P105.4 milyones sa mais; P1.2 milyones sa livestock ug kinadak-an mao ang high value crops nga miabot sa kapin sa P1.5 bilyones kini mao ang mga utanon, lamas, prutas, lagutmon ug uban pa.

Si Gerry Avila, DMO Field Operation Division sa DA Region 7, nga inisyal palang kini kay gibase pa lamang nila ang danyos gikan sa gisumiter sa mga LGUs.

Sumala pa ni Avila nga sagad sa danyos nga natala panahon sa Marso, Abril ug Mayo diin ang mga tanom nangalaya ug nangamatay.

Mao sab kini ang rason kun nganong nisaka og maayo ang presyo sa mga utanon, lamas ug prutas sa kamerkadohan, apan mibutyag nga ilang susihon ang rason kun nganong dunay mga produktong katulo gipilo ang presyo niini karon.

Ang luy-a nga kanhi P60 ngadto sa P100 misaka na ngadto sa P250  ang kilo karon, samtang ang atsal nga tag P120 ang kilo sa una nahimo nang P360 ang kilo, ang kamatis nga libre kaniadto karon P80 kilo samtang ang pechay nga kanhi P20 ug P30 ang kilo karon tag P100 ngadto sa P120 na ang presyo.

Gibana-bana usab nga ma stabilize ang sitwasyon sa mga pananom tulo hangtud sa upat ka buwan sumala pa ni Engr. Cirilo Namoc, OIC Regional Executive Director sa DA Region 7.

Apan magdepende usab sa kahimtang sa panahon ilabi na nga adunay La Niña nga mao na usab ang ilang gipangandaman kauban sa mga LGUs. (BANAT NEWS)