Mga batan-ong nagkarambola pangkasohan
CEBU, Philippines — Gitanggong karon holding facility sa Liloan Police Station ang napulo ka mga batan-on nga nalambigit sa karambola sa usa imnanan diha sa Barangay Poblacion sa lungsod sa Liloan sa miaging Sabado.
Si Police Major Eric Gingoyon, hepe sa Liloan Police Station miingon nga siyam ka mga batan-on ang ilang gikostudiya nga nalambigit sa kagubot ug pagpamato.
Human sa pagkasikop sa siyam, laing batan-on ang gikuyogan og inahan aron sa pagtahan sa kapolisan.
Matud pa sa mga batan-on nagsugod ang maong kagubot dihang gitabangan og kulata ang usa sa ilang kauban.
Sa dihang ilang gipangita kun kinsa ang nikulata sa ilang amigo gikatahong nasukod ang laing grupo ug gilabay sila og mga bato.
Kahinumdoman nga duna say kagubot nga nahitabo sa usa ka convenience store sa Barangay Yati sa Lungsod sa Liloan nga niresulta sa kamatayon sa 16-anyos nga babaye ug miangol usab sa duha ka batan-ong lalaki nga kauban niini.
Ang mga batan-on pasakaan og kaso sa kapolisan aron dili sundon sa uban.
Samtang nag-umol ang kapolisan sa Dakbayan sa Talisay og grupo nga motutok sa mga menor de edad nga balik-balik nalang ma-rescue sa pagpatuman sa curfew.
Si Police Lt. Col. Epream Paguyod, hepe sa kapolisan nga nagtuo nga masolusyonan ang nagpadayon nga suliran sa mga batan-on nga maglaroy-laroy sa lawom na nga kagabhion.
Sa katapusang bahin sa Abril hangtud sa Hunyo, 153 ka mga menor de edad ang na rescue sa kapolisan, GAD Focal, barangay ug CSWD.
Ang curfew sa Talisay magsugod sa alas 10 sa gabii hangtud sa alas 4 sa kaadlawon.
Sila si Paguyod niumol sa grupo nga Project First Salute nga gilangkuban sa nagkalain-laing stake holders sama nalang sa aksyon kabataan, business sector, barangay officials ug CSWS.
Nagsugod na sila sa paghisgot sa guidelines nga sundon sa grupo. Sa ingon nga paagi ilang matutokan ang kanunay na nga maabtan sa curfew.
Maningkamot sab sila nga mahatagan og sulosyon ang mga menor de edad nga wala nay ginikanan o mga guardian. (BANAT NEWS)
- Latest
