Blood Donor Day sa siyudad sa Lapu-Lapu gisanong sa mga Oponganon

CEBU, Philippines — Gipangulohan ni Lapu-Lapu City mayor Junard "Ahong" Chan ug Kongresista Cindi King-Chan ang kalihukan sa 20th anniversary sa World Blood Donor day sa dakbayan sa Lapu-Lapu niadtong Sabado Hunyo 15, 2024.

Ang kalihukan nagdala sa tema alang karong tuiga nga "Dugo ko, Kinabuhi mo, Giluwas ko."   

Nakig-alayon niini mao ang City Health Office, Department of Health, Central Visayas Center for Health Development, National Voluntary Blood Services Program sa DOH ug Subnational Blood Center for Visayas, Lapu-Lapu City Rescue, City Social Welfare and Development Office ingon man usab ang Philippine Red Cross.

Gipahigayon ang bloodletting activity sa Hoops Dome sa Barangay Gun-ob.

Sa iyang mensahe si Mayor Chan mipadayag sa kinasingkasing nga pagpasalamat sa kalampusan sa maong kalihokan nga gipaluyohan usab sa mga Oponganon.

Matud pa niya nga walay kabutangan ang gibati niyang kalipay sa pagtinabangay sa mga Oponganon alang sa pag-donate og dugo ug siya midugang nga dako na kaayong tampo ang pagsanong sa mga Oponganon sanglit ang gidonar nilang usa ka bag nga dugo mahimo kining makaluwas og tulo ka kinabuhi.

Si Dr. Joan Antonette Albito, Medical Officer III sa DOH 7 ug Dr. Agnes Cecile Realiza nga maoy pangulo sa City Health Office ang mipadayag sa kamahinungdanon sa blood donation.

Lakip sa mga barangay nga dunay daghan nga ni donar og dugo mao ang Barangay Ibo,Basak, Pusok, Gun-ob ug barangay Mactan.