Karaan nga senior citizens id gisugyot nga ilisan

CEBU, Philippines — Gisugyot sa pangulo sa Cebu City Office of Senior Citizens Affairs OSCA nga kinahanglan nga i renew ang mga identifications cards sa na rehistro nga mga senior citizens aron malikayan ang anomaliya.

Atol sa programa sa teleradyo sa RMN Sugbuanon Channel gipadayag ni OSCA Administrative Head Reynaldo Abesia nga posibleng hinungdan sa anomaliya sa pagkobra sa cash aid sa seniors mao ang karaan na nila nga ID cards.

Kauban ni Abesia sa programa mao ang kanhi head sa OSCA nga si Rolando Llaguno ug asawa niini nga si Norma Llaguno nga lakip sa guests sa episode sa Sungkod ni Lolo ug Lola teleradyo program.

Gitug-an ni Abesia nga mitumaw na ang maong concern sa milabay nga tigum nila tali sa Senior Citizens Council.

Kadtong mga ID nga dugay na kaayo, nga mga 10 years ago na sukad sa ilang pagka-member nga karaan na kaayo, karon they were advised for the replacement, segun ni Abesia.

Samtang si Llaguno usab miingon nga atol sa iyang termimo sa tuig 2011 ngadto sa 2014, adunay mga kaso nga dunay mga tawo nga nakakuha og fake IDs aron maka claim sa financial assistance.

Kini nga sitwasyona, nahitabo na sauna sa panahon na nag-alagad ko isip Head sa OSCA sa siyudad sa Sugbo. Unya hangtod karon, naa lang gihapon nanghitabo sama aning ang financial assistance na-kobra og lain tao, suma pa ni Llaguno.

Si Llaguno midugang nga misumitir na siya og position paper ngadto sa mga miyembro sa city council aron sulbaron kining pagdaghan sa mga fake IDs.

Gisugyot niini nga himoon ang hinay hinay o ang staggered process sa pag-recall sa mga IDs base sa tuig nga na-isyu ug hulipan kini og mga bag-ong ID nga dunay protective characteristics sama sa barcode o QR code.

If mag reissue naka og bag-ong ID with a protective measure already, of course naa nay imong fill-upan nga mga porma to truly identify yourself; aron sa ingon ana, ma limpyo na ang records sa OSCA and wala nay duplication, dile na mahitabo nga ang financial assistance ma-kobra og lain tao, suma ni Llaguno.

Subay niini si Abesia nanghinaut nga ang ilang buhatan makasugyot og budget aron ma implementar ang maong lakang ug mailisan na ang mga IDs sugod sunog tuig.