Pagkasakmit og loose firearms nakapaalarma sa Talisay police

CEBU, Philippines — Gukdon sa kapolisan sa Dakbayan sa Talisay ang mga indibidwal nga naghupot og armas nga way lisensya.

Kini human walo ka mga armas ang nasakmit sa kapolisan sud sa tulo ka adlaw nila nga operasyon.

 Duha ka armas ang ilang nakuha gikan sa 41 anyos nga lalaki didto sa Barangay Tabunok niadtong Martes sa hapon. Samtang unom sab ka armas ang gikan sa 47 anyos nga lalaki nga nahibaw-ang  ubos sa probation nga taga lungsod sa Barili  apan nag-abang sa Barangay San Roque sa maong siyudad.

Gawas sa armas nakuhaan sab siya og drugas atol sa gihimo nga buy bust operation sa otoridad.

Si Police Lt. Col. Epream Paguyod, hepe sa kapolisan sa Talisay nihangyo sa mga tawo nga naghupot og armas nga way lisensya o ba kaha expired na ang lisensya sa pagtahan niini sa ilang buhatan samtang padayon ang pagproseso sa ilang mga lisensya.

Mosuroy ang kapolisan sa Talisay sa bukirang barangay aron sa paghangyo apan kun sila magmagahi diha na nila himoan og operasyon.

Gihimo nila aron mapugngan ang mga panghitabo nga pagpamusil sa siyudad.— IBM BANAT NEWS