241 ka aplikante sa job fair nakabaton og trabaho

CEBU, Philippines — Niabot ngadto sa 241 ka aplikante ang na-hired on the spot (HOTS) ang natala sa Department of Labor and Employment Central Visayas sa gipahigayon nila nga Kalayaan Job Fairs.

Ang DOLE-7 nipahigayon og tulo ka Kalaayan Job Fairs nga naglangkub sa Cebu City, Trinidad Bohol ug Dumaguete City sa Negros Oriental.

Sa Cebu City adunay 409 ka registered jobseekers ug 135 ang na-hired on the spot, sa Trinidad Bohol adunay 243 ka applikante diin 81 ang na-HOTS.

Sa Dumaguete City adunay 131 ka registered jobseekers ug 25 niini ang na-HOTS. Ang mga na-HOTS mahinangpon ug malipayon usab nga hingpit na silang makasugod sa ilang trabaho nga makatabang na unya sa ilang pagpanginabuhi.

Kasagaran sa mga nadawat sa trabaho mao ang mga cashier diin adunay 36 ka kompaniya ang nisalmot sa maong job fair. Ang DOLE-7 nakig-alayon sa Department of Manpower Development and Placement sa Cebu City Government isip kabahin sa kalihokan sa pagsaulog sa ika-126 ka tuig nga kasumaran sa adlaw sa kaugalingnan. (BANAT NEWS)