Ibabao-Estancia Rondalla nagtinguha pag-angkon sa Guiness World Record
CEBU, Philippines — Daku ang tinguha sa kagamhanan sa siyudad sa Mandaue nga maangkon ug matala sa Guiness World Book of Record nga dunay labing dakong grupo sa Rondalla sa tibuok kalibotan.
Niadtong miaging adlaw nag-courtesy call sa buhatan ni Mandaue City Mayor Jonas Cortes ang Ibabao-Estancia Community Rondalla ug kini ang nahimong tipik sa ilang gihisgotan.
Ang courtesy call natigayon isip kabahin sa gihimong higpit nga pagpangandam sa Ibabao-Estancia Community Rondalla sa ipahigayon nila nga performance karong Hunyo 28 sa Mandaue City Cultural and Sports Complex.
Nunot niini gitinguha sa grupo nga makuha ang Guiness World of Record sa First Largest Rondalla Group in the World.
Gibanabana nga moabot sa 612 ka mga players ang maglangkob sa performance sa rondalla.
Gisuportahan usab ni mayor Cortes ang maong tinguha sa grupo.
Sa nasayran ang rondalla maoy nahimong kabahin sa kultura sa katawhang Pilipinhon sa natad sa musika pinaagi sa paggamit sa nagkadaiyang matang sa mga tulunggon nga adunay kuwerdas, sama sa sista, ukelele, violen, turotot, tambol ug uban pa. (BANAT NEWS)
- Latest
