Taas nga bayranan sa tubig sa lungsod sa Sogod gireklamo

CEBU, Philippines — Midangop sa korte ang usa ka retiradong police aron mahunong ang implementasyon sa kagamhanan sa lungsod sa Sogod sa ordinansa nga nagpatuman og sobra nga pagsingil sa bayranan sa tubig.

Si Jose Marie Espino ug asawa niini nga si Rose Espino, residente sa Sogod, ni-file og petition sa Regional Trial Court sa Danao City aron ideklarar nga null and void ang "Municipal Water Code".

Si Espino kanhi Regional Director sa Police Regional Office-7.

Ang mga respondents sa maong petition mao sila si Sogod Mayor Lissa Marie Streegan ug mga miyembro sa municipal council.

Matud pa ang water rates sa lungsod nisaka og 150 percent human ang Municipal Ordinance No. 15-2003 kun Municipal Water Code giduso sa konseho ug giaprubahan sa Mayor niadtong Nobiyembre 14, 2023.

Giingong wala'y gihimong public hearing labot sa maong ordinansa dihang kini gipasar.

Isip residente ug nanag-iya og negosyo sa lungsod nihimo og lakang ang nahisgutan aron mababagan ang pagpatuman sa ordinansa.

“I started the cause for the no to water increase in Sogod. I was very vocal. I took the cudgels for the people of Sogod because why would they increase the water rate when there was no public hearing", matud ni Espino.

Midugang kini nga isip usa ka second class municipality ang pagsaka sa water rate irregular.

Nagkanayon sab kini nga ang umento sa bayranan sa tubig wala matunong sanglit naay panahon nga wala'y supply sa tubig sulod sa usa ka semana.  Kun mag-uwan sab giingong mahimong brownish ang tubig.

Sa wala pa ang pagpasar sa ordinansa ang minimum water residential rate sa Sogod naa sa P100 matag 10 cubic meters.

Human napasar ang ordinansa ang minimum water rate sa lungsod nisaka og P250 per 10 cubic meters.

Samtang gihimakak sab ni Espino ang istorya nga nagsaba-saba siya sa lungsod kay duna kini plano sa politika. (BANAT NEWS)