CCPO: Patas-an ang pasensiya aron malikay sa kasamok

CEBU, Philippines — Giawhag sa direktor sa Cebu City Police Office Police Colonel Ireneo Dalogdog ang katawhan nga tas-an ng pasensiya ug dili magpadala sa emosyon.

Kini aron malikayan ang kasamok o kagubot nga mosangpot na nga adunay kinabuhi nga makalas.

Matud ni Dalogdog nga kon mahimo molikay sa lalis aron mahilayo sa dakong problema.

Ang maong awhag ni Dalogdog subay sa nahitabo diha sa M. Velez Street, Barangay Capitol Site, Siyudad sa Sugbo sa niaging buwan diin usa ka 34-anyos nga lalaki ang namatay human gibalibag sa 26-anyos nga suspek kinsa niprenda sa iyang cellphone ngadto sa biktima apan dihang lukaton na unta ang maong butang giingong giprenda kini sa biktima ngadto sa lain.

Nakuha sa CCTV ang maong insidente dihang nasuko ang suspek ug gisikaran niini ang biktima kinsa niadtong higayona naglingkod sa motorsiklo.

Wala pa makontento ang suspetsado diin gibalibag niini ang biktima ug napantok ang ulo sa semento.

Sumbagon pa unta sa suspek ang biktima apan wala na niini gidayon human kini nakabantay nga nagkadugo ang ulo sa biktima.

Human sa maong hitabo daling nisibat ang suspetsado pahilayo sa lugar apan nasikop kini dayon sa kapolisan sa Police Station 2 sa Cebu City Police Office pinangulohan ni Police Major Mark Don Alfred Leanza.

Kasong serious physical injuries ang unang gipasaka nga kaso batok sa suspek apan gi-upgrade kini ngadto sa murder tungod kay ang biktima namatay kini. (BANAT NEWS)