Dunay atraso tungod sa drugas gipusil patay

CEBU, Philippines — Nakalas sa usa ka e-bike driver human gipusil patay sa tulo ka wa mailhing mga lalaki  diha sa Barangay Suba sa Siyudad sa Sugbo, kagahapon, 1:30 sa kaadlawon adlaw nga Lunes.

Ang nakalas mao ang 46- anyos nga si Frederick Maitim Mejares.

Matud sa inisyal nga imbestigasyon sa San Nicolas Police Station 6, ang biktima nag-drive sa iyang e-bike ug sakay ang iyang live-in partner.

Kalit lang matud pa miabot ang tulo ka wa mailhing mga lalaki ug gipusil ang biktima kaduha. Misuway unta sa pagdagan ang biktima apan nahagba kini sa dalan.

Ang kapuyo niini nga nahinabi sa Banat News miingon nga bisan siya gisuwayan sab unta sa pagpusil sa mga mamumuno, apan swerte nga nikagar ang armas ug gibiyaan kini sa nagdalidali pag-ikyas nga mga mamumuno.

 "Kay pagkahuman nga nahagba na akoa pares, ako dayon ang gitiunan. Dayon, abi gani nako mobuto ang armas kay kung nibuto pa to, igo ko diri (sa liog dapit),” matud pa niya.

Samtang sa interbyu sa iyang inahan, kini miangkon nga nalambigit sa ilegal nga drugas ang iyang anak ug duna kini mga atraso tungod niini.

"Ang ako nakuanan ana bataa gud nga naa siyay atraso, tungod lage anang shabu," sigon sa inahan. Matud niya dugay nga adunay mga nangita pirme sa iyang anak.

Ang San Nicolas Police Station 6 padayon pa sa pagimbestiga sa maong krimen lakip ang pagpangita sa mga mamumuno. — John Geron Encabo (BANAT NEWS)