Manghod patay sa maguwang

CEBU, Philippines — Gumikan sa kahubog gaaway ang magsuon apan miresulta kini sa pagpanunggab sa maguwang ngadto sa iyang manghod nga nakabsan sa kinabuhi diha sa Purok Thailand, Barangay Libertad, sa Dakbayan sa Bogo, Domingo, Hunyo 9, 2025, sa alas 3 sa hapon.

Ang biktima mao si Nestor Sayson Limpag, 43, residente sa Purok Texas sa maong barangay samtang ang suspek mao ang iyang maguwang nga si Benjie Sayson Limpag, 46,  nagpuyo sa nahitaboan.

Nagkanayon si Police Lieutenant Colonel Joan Arnoco, hepe sa Bogo City Police Station nga samtang nag-uling magsuom giingong nagtagay-tagay ang duha.

Hangtud nga nakahurot matod pa sila og upat ka botelya sa ilimnong makahubog.

Apan dangtan ang pipila ka minutos dunay nahisgutan ang duha kabahin sa ilang pagpangulit nga gikainit sa ilang panaglalis.

Ang maguwang nagdala og sundang samtang ang manghod kahoy ra ang dala. Ang sundang 16 pulgada ang gitas-on dala sa kuptanan niini. "Mosukol ra man unta ang manghod kaso kahoy lang iya mao siya ang napuruhan kay sundang man ang usa," sigon ni Arnoco. Gipasabot ni Arnoco nga gumikan kay namatay ang biktima walay makapamatuod kun si kinsa nilang duha maoy unang nihamag.

Bisan pa niini, gikatakda nga pasakaan og kaso ang suspetsado. (BANAT NEWS)