Mga nagpuyo sa agianan sa lahar gipabakwit

CEBU, Philippines — Gimando sa nagkadaiyang local government units palibot sa bulkang Kanlaon ang pre-emptive evacuation sa pipila ka mga barangay tungod sa hulga sa lahar tungod niining pagsige og bunok sa uwan sumala pa sa report sa Philstar.com.

Sa lungsod sa La Castellana, Negros Oriental, ang mga residente sa lima ka barangay ang pugsanong gipahiklin sa mas luwas nga lugar tungod sa lahar.

Makita sa mga sapa duol sa kanlaon nga ang kaniadto tin-aw nga tubig nahimo nang puti o abuhon tungod sa lahar.

Partikular niini ang sa Guintubdan falls sa La Carlota City ug Baji Baji falls sa Barangay Cabacungan, La Castellana.

Namatikdan sab ang lahar flows s Sto. Guintubdan, Ara-al sa La Carlota City, Buslugan, Busay Oro, Busay Abaga, Busay Mayor, Busay Kapid, Kabkaban, Ezzy, Busay Ambon ug Labi Labi falls.

Namatikdan sa Philippine Institute of Volcanology and Seismology (Phivolcs) niadtong Biyernes sa alas 2 sa hapon ang pagdagayday sa lahar sud sa 80 ka minutos.

Si La Castellana Mayor Alme Rhummyla Nicor Mangilimutan mimando sa pagpabakwit sa mga molupyo sa Barangay Biak Na Bato, Mansalanao, Upper Masulog, Cabagnaan and Sag-ang kay agianan sa tubig gikan sa bulkan ang ilang lugar.

Gipatuman sab ang curfew nga magsugod alas-9 sa gabii hangtud sa alas 6 sa buntag sugod niadtong Biyernes sanglit ubos na sa state of calamity ang lungsod.

Samtang si Mayor Jose Chubasco Cardenas sa Canlaon City miingon nga 1,600 ka maguuma ang naapektahan sa ashfall.

Ang National Disaster Risk Reduction and Management Council miingon nga 682 ka pamilya sa Negros Occidental ug Negros Oriental ang naapektahan sa pagbuto sa maong bulkan.

Giingong moabot na og P9 milyones ang danyos sa agrikultura tungod sa ashfall sa mga umahan sa maong mga probinsya. — /IBM (BANAT NEWS)