52-anyos gigulgol sa liog

CEBU, Philippines — Nalandig sa tambalanan ang usa ka 52-anyos nga babaye human giingong giabis kini sa liog sa iyang uyab nga taxi drayber diha sa N. Bacalso habig sa Barangay Lawaan 1, Dakbayan sa Talisay niadtong Sabado sa gabii.

Ang biktima mao si alyas Merle nga taga sitio Caimito, Banawa, Syudad sa Sugbo. Samtang ang suspek mao ang iyang uyab nga si alyas Alfredo, 58 anyos nga silingan rasab sa biktima.

Si Police Lt. Col. Epream Paguyod, hepe sa kapolisan sa Talisay nibutyag nga nakadawat sila og tawag gikan sa mga sakop sa City of Talisay-Traffic Operation Development Authority (CT-TODA).

Pag-abot sa mga nirespondeng polis gidala na sa Cebu South Medical Center ang biktima samtang ilang nakit-an ang suspek nga nakadugo ug naa na sa posesyon ang cutter ngadto sa mga estambay nga nitabang sa pagpakalma sa komosyon.

Si Paguyod nitataw nga nagmaneho sa motorsiklo ang suspek samtang angkas niya ang iyang uyab nga biktima.

Padung unta sa Siyudad sa Carcar ang duha apan nagkalalis gumikan sa selos hinungdan nga nahitabo ang komosyon ug nisangpot sa paglaslas sa liog sa biktima.

Ang suspek gitanggong sa bilangguan ug gikatakdang pasakaan og kaso. — /IBM (BANAT NEWS)