Drayber og e-bike, gitabangag kulata

CEBU, Philippines — Gitabangan og bunal sa unom ka mga batan-on ang usa ka e-bike driver gamit ang botelya sa softdrinks diha sa dalan Colon sa dakbayan sa Sugbu kagahapon, pasado alas 4 sa kaadlawon.

Ang nahitabong ginukdanay naabtan pa sa mirespondeng mga sakop sa City Mobile Force Company sa Cebu City Police Office kinsa nagpatrolya sa maong dapit maong nangadakpan sab nila dayon ang mga batan-on.

Si Junmar Sere, 24 anyos, nagpuyo sa Barangay Ermita, siyudad sa Sugbo nakaangkon og samad sa ulo ug dunggan ug gani nawad-an kini og panimuot sa dihang gitabangan sa maong mga batan-on.

Ang gwardiya sa usa ka dakong tindahan sa dalan Colon nagkanayon nga giingong gigukod sa unom ka mga batan-on ang biktima ug dihang ilaha kining naabtan, gihapak kini dayon og botelya sa ulo ingon man lawas maong nagpasad ang mga bildo diha sa dalan.

Natumba ang biktima sa kilid sa mall nga gibantayan sa maong gwardiya. Dalidali sab dayong misibat ang grupo apan gidemalas kay naabtan sila sa kapulisan.  Nasayran nga ang biktima nigawas sa ilang balay dala ang e-bike nianang kaadlawon tungod matud pa gaaway kini sa iyahang asawa.

Gituohan nga nag-maoy kini sa imnanan gumikan sa away sa asawa ug posibleng didto nakasugat og kontra sumala pa sa mga polis.

Gidala sa Cebu City Medical Center ang biktima samtang ang unom ka mga batan-on gidala sa Carbon Police Station.

Apan nasayran nga nahilot ra ang bangi sa duha ka kampo sa barangay. (BANAT NEWS)