Lalaking giputos og garbage bag gianod sa sapa

CEBU, Philippines — Usa ka wala mailhing lalaki ang napalgan ang patay sa mabaw nga bahin sa sapa sa Sitio Kaduldulan sa Barangay Manga, Lungsod sa Tuburan, pasado alas 5 sa hapon, adlaw'ng Huwebes.

Ang maong lalake gibana-bana sa Tuburan Police Station nga 5'4 ang gitas-on ug naa sa 30 ngadto sa 40 anyos, kasarangan ang pamanit, itom og buhok ug nagsul-ob og sweatshirt nga dunay markang Adidas.

Dunay patik nga adlaw sa dughan, adunay “love” sa tunga, naa say laing patik sa ibabaw sa bidlisiw sa patik nga adlaw ug laing patik sa tiyan nga “Kanto Boys” ug “Paabuta ako.”

Sigon ni Police Lieutenant Colonel Glenn Hife, hepe sa Tuburan Police Station nga si Manga Barangay Councilor Jandere Flores maoy ni-report sa police station nga dunay nakit-ang patay'ng lawas sa sapa sa Sitio Kaduldulan.

Ang patay'ng lawas giputos og itom nga garbage bag ug gibaatan og packaging tape, ang ulo giputos sab og garbage bag.

Wala hinuyn nakita ang kapulisan nga samad ang patay'ng lawas apan ang tiyan niini ug dughan  adunay bun-og nga gituohang inagian sa pagpasipala sa mga nagbuhat sa maong krimen.

"Hangtod karon wala gyuy niari diri, ni-report nga naay missing person," sigon ni Hife.

Nanawagan si Hife sa ubang kalungsora sa Probinsya sa Sugbo ingon man sa Tri-Cities nga kung naa bay ni-report sa ilang mga police stations bahin sa missing person nga pahibaw-on dayun sila.

Tan-aw sa kapulisan nga tulo ngadto na sa upat ka adlaw na nga patay ang maong lalake ug posibleng gibilin kini kilid sa sapa apan naanod sa dihang misaka ang tubig gumikan sa uwan.

"Mag conduct pa mi og lawom nga imbestigasyon, ang una natong kuan ani nga. Ma identify nato kung kinsa gyud ning tawhana, asa ni siya dapita didto ta magsugod, manukad ta didto taga asa ni, interbyuhon nato ang mga tagtungod kung naay kaila nga tagtungod," matud ni Hife. — IBM BANAT NEWS