Way labut ang pag-alburoto sa Taal sa pagbuto sa Kanlaon

CEBU, Philippines — Gipahibalo ni Philippine Institute of Volcanology (Phivolcs) Director Teresito Bacolcol kagahapon, nga molanat pa og duha ka semana ang himuong obserbasyon sa mga kalihokan sa bulkang Kanlaon una pa sila makaingon kun kinahanglang paubsan o patas-an ang alert level palibot niini.

Atol sa interbyu sa usa ka sibyaanan, giklaro sab ni Bacolcol nga walay koneksyon ang pagbuto sa Kanlaon sa na-monitor nga mga kalihokan sab sa bulkang Taal sa Batangas.

“There is no connection as there is always a possibility that the restiveness of volcanoes in the country will happen simultaneously,” pagpasabot pa ni Bacolcol bahin sa nakitang bagang aso sab nga gibugwak sa Taal.

Hinuon, si Bacolcol miingon nga basi sa ilang pag-monitor sa Kanlaon, nilurang na ang natala nilang volcanic earthquakes kun itandi sa pag-ulbo niini niadtong Hunyo 3.

“Between 12 a.m. yesterday (Thursday) to 12 a.m. today (Friday) we recorded a slight decrease in the number of volcanic earthquakes. Prior to that we recorded 27 volcanic earthquakes,   that was between June 5 and June 6. On June 4,  we reached 53 (volcanic earthquakes), that was a day after it erupted. Yesterday, until midnight, we only had 14 (volcanic earthquakes). We hope this trend of decrease (of volcanic earthquake) will continue,” dugang pa niya.

Apan siya mipasabot nga sa pagkakaron, dili pa gyud sila makaingon kun hingpit na ba gyung nikalma ang bulkan.

“It has only been four days since the Kanlaon Volcano erupted. We really have to check this every day and observe this in a period of time, at least two weeks,” puno pa sa opisyal.

Gibutyag sab niya nga ang haze ug sulfur dioxide gikan sa Kanlaon naabot sab didto sa Bicol nianang pagka-Hunyo 5 tungod sa hangin.

Gipasidan-an sab ang mga molupyo palibot sa bulkan nga magmatngon sa lahar human ang Philippine Atmospheric, Geophysical and Astronomical Services Administration (PAGASA) mipahibalo nga masinati ang mga paguwan hangtud karong adlawa ug ugma.

Sa pikas bahin, mianhi sa Sugbo si Secretary of National Defense Gilberto "Gibo" Teodoro Jr. ug nakigtagbo kini sa kasundaluhon sa Visayas Command.

Miatubang sa mga tigbalita si Teodoro ug usa sa mga gitubag niini ang pangutana mahitungod sa tabang sa nasudnong kagamhanan sa Negros Island nga apektado sa pagbuto sa Mt. Kanlaon niadtong Hunyo 3, 2024.

Matod sa opisyal nihimo na sila og assessment sa kadaot sa pagbuto sa bulkan ug nakita nila nga sagad sa mga apektado ang mga Lungsod nga sakop sa Negros Occidental.

Nagkanayon kini kinahanglan maghimo og contingency plans kung panglitan dunay emergency sa ubang probinsiya sa Visayas o kaha mag-ulan nga moresulta sa mud flow ug lahar.

Nasayran ang Department of Social Welfare and Development nagpadala na og mga tabang sa mga apektado sa pagbuto sa Mt. Kanlaon.

Naghinaot si Teodoro nga dili molanat og dugay ang problema sa Mt. Kanlaon sama sa nahitabo sa pagbuto sa Bulkang Mayon. — Gikan sa Philstar News Service ug report ni Decemay P. Padilla, IBM BANAT NEWS