Trahedya sa kadagatan sa Naga

CEBU, Philippines — Unom ka tawo ang patay samtang laing unom ang naluwas human nasunog ang fishing boat nga ilang gitrabahoan diha sa kadagatan sa Dakbayan sa Naga, pasado alas 7 sa gabii, Miyerkules, Hunyo 5, 2024.

Usa sa mga naluwas sa hitabo mao ang kapitan sa FB King Bryan nga si Mark Anthony Sullano. Kini mibutyag nga mibiyahe sila gikan sa Cawayan Port sa Masbate niadtong Hunyo 2, 2024 sa alas 6 sa gabii padung dinhi sa Sugbu.

Matud pa niya, giayo ang usa sa mga makina sa ilang fishing boat anang tungra sa dihang dunay mibuto pasado alas 7 sa gabie.  Giingong duna silay unom ka drums nga krudo para sa ilang makina ug tulo ka liquefied petroleum gas (LPG) tanks para sa ilang pagluto.

"Kalit ra kaayo, wala ko kahibawo, disgrasya gyud...diesel among kunsumo (karga), mga unom ka drums, tulo ka gasul," sigon ni Sullano.

Si Petty Officer 1st Class Joel Baring sa Coast Guard Sub-Station Naga miingon ang mga personnel sa tugboat nga duol sa nahitaboan mitabang sa pagluwas sa mga survivors ug pagpawong sa kalayo.

Sigon ni Baring nga alas 8:20 sa gabii sa dihang nakadawat sila bahin sa maong hitabo maong dali silang niresponde sakay sa aluminum boats ug mitabang sa rescue operation.  Na-recover dayon ang upat ka mananagat nga nakalas, apan tungod sa dautang panahon temporary nilang gihunong ang rescue operation nianang gabii.

Kagahapon sa buntag gibalikan nila ang operasyon ug alas 7:54 sa buntag  naugkat ang patay'ng lawas sa laing duha ka mga tawo nga namatay sa hitabo.

Nasayran nga 12 ka tawo ang tripulante sa FB King Bryan, apan ang unom niini nakalas samtang ang unom naluwas apan usa nila kritikal ang kahimtang.

Gawas kang Sullano naluwas sila si John Cloud Canones, 20 ; Alan Aviles, 18; Michael Bacas, 34; Miguel Cortes, 32, ug Alvin Quinoñes, 21, kinsa angol sa hitabo.

Samtang ang mga nakalas giila nga sila si Boy Boy Bacolod, 39; Ariel Codilla, 37; Jonathan Sullano, 34; Dominic Cleret, 18; ug Joseph Sullano 29.

Base sa nahipos nga impormasyon sa PCG, si Baring miingon nga Miyerkules sa alas 11 sa buntag naaberya ang usa sa makina sa maong panagatan samtang naglawig sila padung sa Cebu.  Nianang pagka-alas-2 sa hapon naglawig ang banca paingon sa southern part sa Sugbo gamit ang single engine samtang giayo ang naguba.

Ug nianang pagkagabii padayon nila kining giayo apan pagabot nila sa kadagatan sa Dakbayan sa Naga nahitabo ang maong aksidente.

"Ang ingon ni Kapitan ang uban katong casualties mao to sila ang nakatuka sa makina para mag repair unya sa unom nga survivor nga grabe gyud iyahang sunog mura kuno siya og nalagpot unya naay part sa iyang tiil nga nabali,"  dugang pa ni Baring.

Sigon ni Baring nga ang Kapitan dunay mga dokumentong dala nga magpamatuod nga legal ilang pagpanagat apan naapil lang kini kasunog hinoon dunay kopya matud pa ang tag-iya sa banca.

"Sa pagkakaron dili pako maka disclose (lapso) kay karon bag-o pa nahuman ang retrieval operation," ni Baring pa.

Giklaro ni Baring nga wala'y nakita ang coast guard personnel nga explosive o kaha items nga posibleng gamiton sa illegal nga pagpanagat.

Wala say nakita nga dunay oil spill sanglit ang fishing boat gipadagan sa diesel. Gitinguha sa PCG nga maguyod sa baybayon ang maong panagatan sanglit agianan sa mga barko ang lugar diin kini nasunog. (BANAT NEWS)