CDRRMO andam mopadala og team sa Canlaon City 

CEBU, Philippines — Andam ang Talisay City Disaster Risk Reduction and Management Office nga mopadala og mga sakop didto sa Siyudad sa Canlaon, Negros Oriental. Kini aron makatabang ngadto sa lokal nga kagamhanan sa pag-hatag og ayuda sa mga apektadong pamilya.

Si Joel Sisa, pangulo sa operation sa CDRRMO nagkanayon nga usa ka team ang ilang giandam kong kinahanglan na gyud sila nga magpadala og sakop ngadto sa Negros.

Matud ni Sisa nga dili ra maapektohan ang ilang operasyon bisan pa og magpadala og sakop tungod kay igo pa ang ilang gidaghanon.

Sayo pa, ang Mt. Kanlaon nibuto kini hinungdan nga gipabakwit ang mga residente didto sa lugar.

Ug ang tubig sa sapa didto sa lugar sama na kini og lugaw sa abo nga nagdagayday.

Gibutyag ni Sisa nga nakaestambay sila karon diin naghuwat sila sa kamandoan kong magpadala og team ngadto sa Canlaon City.

Nunot niini, si Mayor Jose Chubasco Cardenas sa Canlaon City nipahigayon og inspection sa mga kasapaan sa Barangay Masulog nga adunay lahar human sa pagbuto sa Mt. Kanlaon.

Nasayran nga kontaminado ang ilimnon nga tubig sa maong barangay hinungdan nga gipadala sa LGU-Canlaon ang Water Filtration Truck didto sa maong dapit.

Adunay schedule nga gipatuman aron ang katawhan makasawod og tubig nga mainom sa ilang tagsa-tagsa ka mga panimalay.

Si Cardenas nibisita usab sa silingan nga kalungsuran ilabi na ngadto sa La Castellana aron sutaon ang ilang kahimtang ug nitanyag usab kini og tabang.

Ang mayor nipahimangno usab sa katawhan sa mga angayan nga buhaton sa higayon nga adunay lahar. (BANAT NEWS)