Biker patay sa karambola sa mga sakyanan

CEBU, Philippines — Patay ang usa ka 57-anyos nga lalakeng nagbiseklita human kini maapil sa nahitabong panangbangga sa tulo ka sakyanan sa dalan S. Osmeña ug V. Sotto Intersection, Barangay San Roque, Siyudad sa Sugbo niadtong Lunes sa gabii, Hunyo 3, 2024.

Ang biktima mao si Roel Toquib Aurello, 57, nagpuyo sa Sitio Riverside, Villagonzalo I, Barangay Tejero, Cebu City.

Base sa imbestigasyon sa Traffic Enforcement Unit sa Cebu City Police Office, ang Navarra gimaneho sa usa ka 56 anyos nga taga Maghaway, Talisay City  nga paingon sa Talisay City  diha agi sa tunga nga lane samtang sa inner lane tupad sa center island ang nakalas.

Ang prime mover nga gimaneho sa usa ka 36 anyos nga taga Barangay Yati, Liloan ug ang Wigo nga gimaneho ni Loid Anthony Cadungog, 32, taga Lungsod sa Consolacion gabiyahe sa kasugat nga lane.

 Matud pa, kalit nawagtangan og kontrol si Cadungog sa iyang awto ug napadung sa prime mover.  Human niini, nalahos siya sa center island ug naigo sab ang Navarra ug sunod nga naigo ang nagbisekletang si Aurello.

Nalabay ang biktima sa karsada ug tungod sa grabeng kadaut nga naangkon nakabsan kini sa kinabuhi.

Si Cadungog  posibleng mag-atubang og kasong reckless imprudence resulting in damage to property with homicide.

Sa laing aksidente, naangol ang driver ug duha ka pasahero dihang nagbangga ang usa ka van ug 10-wheeler truck sa Naga-Uling Road, Barangay Uling, Dakbayan sa Naga Lunes sa hapon, Hunyo 3, 2024.

Ang mga naangol mao sila si Francisco Siason Jr., 43, driver sa van ug mga pasahero niini nga sila si Noel Santa Rita, 36,  ug Nestor Gemilian, 36.

Samtang ang driver sa 10-wheeler truck mao si Sadili Fernandez Nable, 34.  Sa imbestigasyon sa Naga City Police Station ang van padulong sa Cebu City gikan sa Toledo City samtang ang 10-wheeler truck paingon sa Barangay Pangdan.

Pag-abot sa naasoy nga dapit ang 10-wheeler truck nawad-an og brakes ug nadagmagan niini ang van una pa kini natagak sa bung-aw.

Samtang sa laing bahin, gidakop sa City of Talisay-Traffic Operation Development Authority (CT-TODA) ang drayber sa prime mover nga nagguroy og trailer nga hilis ug nagpaka-paka ang flat nga ligid.

Kini human nga nabantayan sa mga enforcers ang kahimtang sa maong trak sa dihang naagi kini diha sa eskina sa San Isidro Junction sa Cebu South Coastal Road (CSCR) niadtong adlaw nga Lunes.

Giingon nga samtang giguroy ang trailer nagpaka-paka ang flat nga ligid ug nagtakilid ang dagan niini apan wala ra manumbaling ang drayber. Si Jonathan Tumulak, pangu sa CT-TODA nagkanayon nga reckless driving ang ilang giisyu batok sa drayber tungod kay peligro ang gibuhat  niini.

Giawhag ni Tumulak ang mga operator nga siguraduhon gyud nga kondisyon ilang mga sakyanan sa dili pa padaganon aron kalikayan ang disgrasya. (BANAT NEWS)