Suspek sa pagpusil patay sa usa ka tomboy nasikop

CEBU, Philippines — Nadakpan sa Carbon Police Station ang gitumbok nga suspek sa pagpusil patay sa usa ka 36-anyos nga tomboy sa sitio Bato, Barangay Ermita, siyudad sa Sugbo kagahapon sa hapon.

Ang suspetsado mao si alyas Papart, 26 anyos, residente sa naasoy nga lugar.

Matud ni Police Major Philip Libres, Hepe sa Carbon Police Station nga base sa istorya sa mga saksi ang biktima giingong dunay gikaaway niadtong Biyernes o Sabado sa gabii.

Kini tungod kay giingong namarok ang biktima apan giuli niya ang duha ka sachet sa shabu ngadto sa suspek kay wala mauyoni sa nagpalit kay gagmay nga maoy rason nga nasuko ang suspek ug gibunalan og lingkuranan ang ulo sa biktima.

Gani ang kaipon sa biktima nga si alyas Lit miingon sab nga ang suspek mibahad nga badlungon niini ang iyahang kaipon.

Nagkanayon si Major Libres nga nakasinggit pa ang biktima og " Ayaw part" nga nakahatag og lead sa kapolisan ug nahibaw-an nila nga duna gyuy gikabangi ang biktima. Nasayran nga nadakpan niadtong 2019 ang suspetsado gumikan sa pagkalambigit sa illegal nga drugas ug nakagawas Disyembre 2023.

Samtang gihimakak sa suspek nga siya ang nipusil sa biktima ug igo lang siya nga napasanginlan tungod kay sila man ang kataposan nga nagkabangi.

Atol sa hitabo natulog siya didto sa ilaha ug nakamata na lang sa buto sa armas.

Gihimakak sab niya nga namaligya siya og drugas kay sigon niya dihang nakagawas siya sa prisuhan niundang na siya sa maong illegal nga binuhatan.

Sa laing bahin gibansay ang kapolisan sa dakbayan sa Talisay sa pag gamit sa high tech nga kahimanan alang sa pagresponde sa bisan unsa nga krimen.

Gigamit nila ang GPS ug alarm system sa command center sa Talisay City Police Station.

Gihimo nila ang Simultaneous Exercise (SIMEX) nga daw adunay tulis ug hostage taking nga nahitabo diha sa tindahan sa South Central Square nga gipanag-iya ni Cyril Velasco.

Ang high tech nga kahimanan mao sab ang nihatag og kapaspas sa pagresponde sa City Disaster Risk Reduction and Management Office (CDRRMO) ug sa City of Talisay-Traffic Operation Development Authority (CT-TODA).

Gitambongan ang kalihukan sa grupo sa mga negusyante.

Samtang si retired general Patrocinio Comendador nga mao sab ang peace and order consultant maoy nihatag og komentaryo sa kinatibuk-an nga kalihukan. (BANAT NEWS)