1,000 ka mag-uuma sa Cebu City nakadawat og ayuda

CEBU, Philippines — Niabot ngadto sa 1,000 ka mag-uuma gikan sa lima ka barangay sa Dakbayan sa Sugbo ang nakadawat og ayuda gikan sa kagamhanan sa siyudad niadtong Sabado.

Si Acting Mayor Raymond Alvin Garcia ang nangulo sa pagpang-apod-apod uban sa mga konsehal sa siyudad nga gilangkuban nila ni Francis Esparis ug Rey Gealon.

Si Garcia nagkanayon nga ang gobiyerno sa siyudad nigahin og hinabang ngadto sa mga mag-uuma kinsa naglisod karon sa ilang panginabuhian gumikan sa epekto sa huwaw.

Gipadayag ni Garcia nga naa ra kanunay ang gobiyerno nga motabang ngadto sa mga nanginahanglan bisan og ginagmay nga tabang.

Ang mga mag-uuma nga apektado sa huwaw mao ang mga residente sa mga barangay sa Sudlon I, Sudlon II, Sinsin, Buot ug Babag.

Samtang ang pangulo sa City Agriculture Department Joelito Baclayon nagkanayon nga ang pag-apod-apod sa ayuda kabahin kini sa nasugdan ni Mayor Michael Rama nga hinabang sa wala pa kini masuspenso.

Nasayran nga aduna pa unya’y ayuda nga ihatag ngadto pa sa ubang mga mag-uuma nga apektado. — /BDB (BANAT NEWS)