Candle lighting gihimo sa pagsaulog sa International AIDs/HIV Day

CEBU, Philippines — Gipasiugdahan sa kagamhanan sa siyudad sa Mandaue ang kalihukan sa International AIDS/HIV Memorial Day niadtong Biyernes.

Lakip sa gihimo ang candle lighting nga gitumong aron paghandum ug pag-ampo alang sa mga biktima sa AIDS (HIV) nga gipahigayon atubangan sa Mandaue City Hall.

Si Mandaue City mayor Jonas Cortes maoy nangulo sa maong kalihokan pinaagi sa pagdagkot og kandila agi og pagtimaan sa International AIDS/HIV Memorial Day nga giubanan usab sa mga sakop sa konseho.

“We are devoted to building a society where everyone feels valued, safe and supported. Let the glow of light inspire us to continue striving for a world where emphathy and undestanding triumph over ignorance and discrimination,” suma pa ni mayor Cortes sa iyang mensahe.

Dugang tumong sa maong kalihokan mao ang paghatag usab og awareness sa katawhan kalabot sa sakit nga HIV/ AIDS.

Si Mayor Cortes sa iyang mensahe kusganon nga nagpahimangno nga pakigbatokan ang maong sakit ug modangop gilayon sa mga health center sa kagamhanan alang sa pagpa-check-up sa maong matang sa balatian.

Gidasig usab ang importansya sa pagpa-check-up aron mahatagan og bili ang panglawas sa isig-ka-tawo ug dili angay mahadlok moduol sa mga health workers.

Ang kalihukan gitambongan sa kadaghanan sa mga youth ug mga miyembro sa LGBTQA nga giabagan usab sa Mandaue City Health Office. Ang DOH-7 mipahibawo usab nga ang usa ka semana nga kalihukan nag-feature sa sunod sunod nga mga kalihukan apil na ang HIV awareness seminars, free counseling and testing, and community initiatives nga gitumong aron pag-alkontra sa stigma ug discrimination. (BANAT NEWS)