Aksyon agad sa Talisay gisalmotan sa kapolisan

CEBU, Philippines — Giapilan sa kapolisan sa Dakbayan sa Talisay ang kalihukan sa Aksyon Agad sa Barangay nga gihimo sa Barangay San Isidro.

Si Police Lt. Col. Epraem Paguyod, hepe sa kapolisan sa Talisay mao mismo ang nitambong sa kalihukan ug nakighimamat sa mga opisyales sa barangay ug katawhan.

Ang Aksyon Agad sa Barangay, programa ni Talisay City mayor Gerald Anthony Samsam Gullas diin dad-on nganha sa kabaranggayan ang mga serbisyo sa dakbayan sa Talisay.

Ang kapolisan niapil niini ug nihatag sab og seguridad sa katawhan nga misalmot sa kalihukan.

Gipahimuslan ni Col. Paguyod ang higayon tungod kay naa man ang presensya sa mga opisyales sa barangay.

Iyang gipaminaw ang ilang mga yangu-ngo aron mahatagan og igo nga pagtagad.

Sa nasayran ang maong programa gihimo matag adlaw nga Huwebes diin himoon sa mga opisyales ang paglibot sa nagkalain-laing barangay sa Talisay. (BANAT NEWS)