Walo ka oras ibabaw sa tower

CEBU, Philippines — Walo ka oras ibabaw sa usa ka tower sa telco ang usa ka menor de edad nga giingong adunay kakulian sa pangisip.

Ang kapulisan ug kabomberohan sa Toledo City  nga miresponde sa alarma nakig-estorya kaniya sud sa maong mga oras samtang naa kini sa tumoy sa tower nga nahimutang sa Sitio Babag, Barangay Pangamihan, Toledo City niadtong Mayo 29, 2024.

Ang tower gibana-banang dunay gitas-on nga 250 ka tiil matud pang Police Lieutenant Colonel Manolo Salvatierra, Hepe sa Toledo City Police Station. Giingon nga ang unang mihangyo sa menor de edad mao ang mga opisyales sa barangay officials apan wala kini mopatuo kanila maong nanawag sila sa

kapulisan, kabomberhon ug City Disaster Risk Reduction and Management Office.

Nagdala og mga ekipo nga magamit ilabi na nga habog ang gisak-an nga tower sa menor de edad ang mga miresponde ug gipadayon ang negosasyon hangtud nga pag-alas 3 na sa hapon nakombinsir nila kini nga monaog sa tower.

Plano matud pa sa pamilya nga dad-on sa siyudad sa Sugbo ang menor de edad aron matambalan. (BANAT NEWS)