Kalabera sa babaye napalgan

CEBU, Philippines — Usa ka kalabera nga gituohang iya sa usa ka babaye ang napalgan sa kali-bunan sa Barangay Casay sa Lungsod sa Argao, kagahapon Lunes sa buntag.

Ang maong kalabera napalgan kini sa usa mga residente nga nanguha og panglawug sa iyang kanding sumala pa ni Casay Captain Marlon Sombilon. Nabantayan ng daan nga pwerteng bahoa sa lugar diin nakit-an ang maong kalabera. Gawas pa niini, duna say nakitang holster o sakuban sa armas nga gibit-ay sa usa sa mga kahoy duol sa nahimutangan sa maong kalabera.

Dali kini nga gitaho sa nakakaplag ngadto sa mga barangay opisyal ug ang mga opisyal nibutang og cordon sa dapit ug dayon tawag sa kapulisan sa Argao.

Ang kapita nipadayag nga dili layo sa kalabera, adunay pipila usab ka mga bukog sa ubang bahin sa lawas, diin gisubay kini karon kun iya ra usab kini sa tag-iya sa kalabera.

Dugang pa sa kapitan nga ang maong dapit diin nakit-an ang kalabera da-ghan og mga mananap ihalas sama sa halo ug posibleng gikaon niini ang mga parte sa lawas maong nagkatagkatag.

Ang kapulisan sa Lungsod sa Argao kay aduna nay gituohang ilhanan kun kinsa ang maong kalabera apan paabuton pa nila ang mga kabanay niini aron kompirmahon kun mao ba kini ang ilang gipangitang kabanay.

Samtang gipaladman pa usab sa kapulisan ang imbestigasyon pagsuta kun kini biktima sa krimen ug kun duna may nipasipala kaniya susihon kun unsay motibo aron mahatagan sila og ideya kun kinsay pangitaon ug taralon ngadto sa hukmanan. (BANAT NEWS)