FLI nitanyag og libreng sakay sa SRP

CEBU, Philippines — Ang mga Cebuano ug turista makasuroy na kini diha sa South Road Properties (SRP) area pinaagi sa libreng sakay sa moderno, limpiyo ug ariconditioned nga shuttle bus gikan sa alas 8:00 sa buntag diin ang kataposang biyahe niini alas 10:00 sa gabii.

Aduna nay pipila ka mga establisamento lakip niini ang mga mall, hotel, condominium, restaurants, food park, sports and fitness diha sa palibot sa SRP lapas sa SM Seaside City apan daghang mga tawo ang nagduha-duha sa pagsuroy niini tungod kay walay public transportation nga mobiyahe diha sa maong mga lugar.

Usa sa katambayayong sa kagamhanan sa siyudad ang Filinvest Land pinaagi sa City di Mare (CdM) ang nakahuna-huna sa pagpalit og shuttle buses ug nagtanyag og libreng sakay diin ang CITRASCO maoy operator niini.

Kagahapon, si Gwen Sala, assistant manager sa FLI sa City di Mare nagkanayon nga ang shuttle buses pareho kining magserbisyo sa publiko ug mga empleyado sa SRP diin ilang nasayran nga lisod ang pag-anha sa lugar.

Sa pagkakaron, aduna sila’y tulo ka buses nga adunay lain-laing kolor aron sayon kining mailhan.

Gikan sa Il Corso, ang CdM pink buses mobiyahe kini hangtud sa Dakbayan sa Talisay via R & M Auto Repair Shop ug balik diin anha kini moagi sa CEIVADI Warehouse, V.H. Garces dayon balik.

Ang blue bus, gikan sa Il Corso paingon sa F. Vestil ug N. Bacalso Avenue, balik gikan sa N. Bacalso moagi kini sa F. Vestil, L. Gabuya, C. Padilla, Magallanes, Aduana, Cebu South Coastal Road dayon balik.

Samtang ang green nga bus, gikan sa Il Corso moagi sa F. Vestil, N. Bacalso Avenue, F. Llamas, Katipunan, R. Duterte, V. Rama ug Archdiocesan Shrine of Our Lady of Guadalupe de Cebu sa Barangay Guadalupe dayon balik.

Matud ni Sala nga gipili nila ang tulo ka rota tungod kay moagi kini sa mga barangay nga highly populated ug nagkihanglan og dugang public transportation ug depende sa panginahanglan sa publiko ang pagtanyag sa libreng sakay.

Giingong ang libreng sakay usa ka maayong balita sa mga gustong motan-aw sa mga kalihokan sa Palarong Pambansa nga ipahigayon diha sa SRP sa buwan sa      Hulyo karong tuiga. — The Freeman